Tiener vas ná sy glo baba ontvoer

2012-07-03 15:07

Johannesburg – 'n Vyftienjarige meisie is in hegtenis geneem in verband met die ontvoering van 'n drie weke oue baba in Oudtshoorn, het die Wes-Kaapse polisie Dinsdag gesê.

Kapt. Malcolm Pojie het gesê die baba is Dinsdag in Ladismith by die tiener gevind nadat die polisie op 'n wenk gereageer het.

Die tiener is in hegtenis geneem. Sy mag egter nie geïdentifiseer word nie en sal Woensdag in die Oudtshoorn-landdroshof verskyn op 'n aanklag van ontvoering.

Die baba se ma het die kind saam met haar 14-jarige neef buite 'n Spar-supermark gelos terwyl sy geld by 'n kitsbank gaan onttrek het.

Die meisie, wat ‘n vreemdeling was, het die neef glo gevra om ‘n geheuestokkie met ‘n R10-noot te gaan koop. Sy het met die baba verdwyn terwyl hy weg was.

"Die baba is glo ongedeerd en sal binnekort vir 'n mediese ondersoek geneem word," het Pojie gesê.

Die departement van maatskaplike ontwikkeling het gesê hulle gaan die ma ondersoek en haar woonreëlings nagaan.

"Die kind sal tydelik na 'n plek van veiligheid geneem word hangende die uitkoms van die departement se konsultasie wat sal bepaal of die kind aan die ma teruggegee gaan word."

– Volg Nuus24 op Twitter.

- SAPA