Tiener noem aanvaller se naam voor sy sterf

2013-02-06 12:33

Kaapstad –  ’n Sewentienjarige meisie van Bredasdorp wat verkrag, aangerand en vir dood gelaat is, het die naam van een van haar aanvallers genoem voor sy in die hospitaal gesterf het.

Anene Booysen is Saterdag met ernstige beserings na 'n plaaslike hospitaal geneem nadat sekuriteitswagte by 'n bouterrein op haar afgekom het, het Die Burger berig. Sy is later na die Tygerberg-hospitaal oorgeplaas, waar sy Saterdagaand gesterf het.

Die vermeende aanvaller wie se naam sy genoem het, is in hegtenis geneem en die polisie is nou op soek na nog drie verdagtes.

Kapt. Frederick van Wyk, provinsiale polisiewoordvoerder, het gesê die aanklagte is ná Anene se dood na verkragting en moord verander.

’n Bron by die hospitaal het aan Die Burger gesê haar beserings was van so ’n aard dat hulle haar nie daar kon behandel nie.

“Dit was een van die wreedste wat ons nog hier by die hospitaal gesien het. Te wreed om in enige koerant te noem.”

– Lees meer hier

– Volg Nuus24 op Twitter