Tien vas vir brandstigting in Oos-Kaap

2012-08-28 22:53

Johannesburg – Tien mans het in die Motherwell-landdroshof in Port Elizabeth verskyn op aanklagte van brandstigting, het die Oos-Kaapse polisie Dinsdag gesê.

Volgens ao. Dumile Gwavu is die saak vir verdere ondersoek uitgestel.

Die mans is elkeen op borgtog van R500 vrygelaat.

Hulle word daarvan beskuldig dat hulle Maandag twee plakkershutte in Mpangelestraat in Motherwell aan die brand gesteek het.

"Daar was 'n gerug dat die groep ontsteld was oor beshuising, maar dit is nie bevestig nie," het Gwavu gesê.

Die groep het ook 'n vrou se meubelstukke en van haar klere aan die brand gesteek.

Die mans moet op 20 September weer in die hof verskyn.

– Volg Nuus24 op Twitter.

- SAPA