Thomas kry fyn koek op sy 19de
2012-01-05 07:42
Johannesburg – Presies twee maande ná die ongeluk wat hom in ’n koma gelaat het, bring Thomas Ferreira vandag sy 19de verjaardag in ’n rehabilitasiesentrum deur.
“Hy vorder eintlik baie goed,” het sy ma, Priscilla, aan Beeld gesê.
“Hy eet nou saam met die res van die mense in die eetkamer en hy drink baie mooi.
“Hy gee ook al treë.
“Ons het Nuwejaarsdag saam met hom gaan piekniek hou buite en hy was mal daaroor. Die vars lug doen hom goed.”
Thomas sukkel nog om te praat, maar dit kom met tyd, het Ferreira gesê. Hy kry spraakterapie.
Thomas is op 5 November verlede jaar op sy motorfiets deur die bloulig-ampsvoertuig van Humphrey Mmemezi, Gautengse LUR vir plaaslike regering en behuising, omgery.
Hy is ernstig beseer en was lank in die hospitaal, maar is nou by die Riverfield Lodge-rehabilitasiesentrum in Fourways.
Hulle “gee glad nie om” dat Thomas sy verjaardag by die sentrum moet deurbring nie, het Ferreira gesê.
Oor hul verjaardagplanne het sy gesê: “Hy gaan ’n lekker stuk koek eet. Ek weet hy’s op ’n dieet van sagte kos, maar ek sal dit vir hom fynmaak!”
Wat wél vir hulle swaar is, is dat die matriekuitslae vandag bekend gemaak word. Thomas was in die middel van sy matriekeksamen toe die ongeluk gebeur het.
“Ons is hartseer, want al sy vriende kry nou hul uitslae, maar ons fokus op sy gesondheid. Ons sal dit vir hom verduidelik. Ons het nog glad nie besluit wanneer of waar hy die eksamen sal oorskryf nie.”
Volgens Ferreira het hulle met Thomas se skoolhoof vergader, wat verduidelik het dat hy wel die eksamen sal moet oorskryf en nie op grond van sy rekordpunte matriek kan slaag nie.
Mongezi Monyane, hoof van Mmemezi se departement, het gesê hy gaan met die gesin vergader oor die betaling van Thomas se mediese koste soos belowe deur die Gautengse premier, Nomvula Mokonyane.
Karl Schuler, die Ferreiras se regsverteenwoordiger, het dit bevestig, maar sy ontevredenheid uitgespreek omdat die provinsiale regering direk met die gesin geskakel het terwyl dit bekend is dat ’n regsfirma namens hulle optree.
– Volg Nuus24 op Twitter
- Beeld