Thomas: Ouers nog in duister
2011-12-05 09:05
Johannesburg – Presies ’n maand sedert Thomas Ferreira (18) in ’n koma verval het ná ’n bloulig-ongeluk, was sy ouers steeds in die duister oor die provinsiale regering se bydrae tot sy mediese uitgawes.
Behalwe dat die Ferreira-gesin van Krugersdorp nie weet hoeveel die Gautengse premier gaan bydra nie, is daar ook nie nuwe inligting oor die vordering van die polisie-ondersoek nie.
Thomas, ’n matriekleerling aan die Hoërskool Bastion, is op 5 November op sy motorfiets deur ’n LUR se ampsmotor omgery.
Hy is sedertdien in die Krugersdorp-hospitaal en was 20 dae in die waakeenheid voordat hy na ’n private kamer geskuif is.
By Beeld se besoek laas week was sy oë oop, hoewel hy nog in ’n semi-koma is. Hy kan nie praat nie, maar beweeg sy mond.
“Die dokter sê dit het Donderdag die eerste keer gelyk of sy oë jou begin volg. Sy oë is ook helderder,” het mnr. Paul Ferreira, Thomas se pa, gesê.
Die gesin is “baie rustiger” oor hul seun se toestand.
“Hy’s nie meer in gevaar nie,” het Ferreira verduidelik.
Thomas kry voeding deur sy neus, maar ’n voedingsbuis word vandag in sy maag geplaas.
Dit dra ’n kleiner infeksierisiko en hulle kan hom dan ook in ’n rolstoel sit.
Nomvula Mokonyane, Gautengse premier, het vroeër belowe om Thomas se mediese uitgawes te betaal.
Die Ferreiras sou teen einde verlede week hoor wat dié hulp behels, maar het eers gister van die premier se kantoor verneem nadat Ferreira navraag gedoen het.
Xoli Mngambi, Mokonyane se woordvoerder, het Ferreira Saterdag gebel en gesê hy het met die premier gepraat en hulle sal in die komende week meer inligting gee.
Ferreira het gesê Thomas moet môre weer vir ’n skandering gaan en hul mediese fonds betaal nie alles nie.
Die Ferreiras wil Thomas na die Riverfield Lodge-rehabilitasiesentrum naby Muldersdrift aan die Wes-Rand stuur.
Die maandelikse koste begin by sowat R100 000, wat nie medikasie insluit nie.
Hulle weet nie of die premier se aanbod die rehabilitasiekoste insluit of hoe lank Thomas se rehabilitasie gaan neem nie.
Mngambi het Sondag gesê die saak is tussen die premier en die gesin en hy kan nie inligting daaroor gee nie.
Die Ferreiras het ook nog geen terugvoering van die polisie gekry oor die klag van roekelose en nalatige bestuur wat ondersoek word nie.
“Wat erg is, is dat (die bestuurder) nie eens belang gestel het nie. Dis onmenslik. Dan dink jy die klag moet maar poging tot moord wees,” het Ferreira gesê.
Hulle gaan ’n derdeparty-eis instel, maar omdat hulle moet wag vir volledige mediese verslae sal dit waarskynlik ’n paar jaar duur voordat hulle met die eis kan begin.
Dié verslae sal bepaal wat die omvang van Thomas se beserings en die langtermyngevolge daarvan is.
Volgens lt.kol. Katlego Mogale, polisiewoordvoerder, moet verklarings nog by ’n paar ooggetuies afgeneem word.
– Volg Nuus24 op Twitter
- Beeld