The Spear: Talle drom saam buite hof

2012-05-24 11:00

Johannesburg – Strate in die Johannesburgse middestad is afgesper aangesien die ANC in die hooggeregshof verskyn in verband met ‘n omstrede kunswerk van pres. Jacob Zuma.

Supt. Wayne Minnaar van die Johannesburgse metro-polisie sê Pritchardstraat tussen Von Wielligh- en Von Brandisstraat sal toe wees. Kruisstraat sal ook by Presidentstraat afgesper wees. Hy sê motoriste kan Mark- en Jeppestraat gebruik.

Sapa berig daar is ‘n sterk polisie-teenwoordigheid buite die hof.

Regter Kathree Setiloane het e.tv en eSat toestemming gegee om die hofverrigtinge uit te saai. Die hofverrigtinge het pas begin.

Die regerende party het aansoek gedoen om 'n hofbevel wat die Goodman-galery in Johannesburg dwing om die omstrede kunswerk The Spear te verwyder.

Die ANC eis ook dat City Press die skildery van sy webtuiste verwyder.

Zuma se kinders sal ook deel wees van die saak.

Die skepper van die kunswerk, Brett Murray, het ook aansoek gedoen om deel van die hofverrigtinge te wees.

Volg Nuus24 op Twitter  

- SAPA