ET was geheime vrou se 'sielsgenoot'
2012-02-12 07:07
Lydenburg – Eugène Terre’Blanche (67) was haar sielsgenoot en sý was die vermoorde AWB-leier se “wyfieleeu” en “sielsmaat”.
So het Ilse Venter (51), tot nou die ander geheime vrou in Terre’Blanche se lewe, die afgelope week gesê.
Sy het met die hervatting van die AWB-leier se moordsaak in Ventersdorp Rapport genader om te vertel van hul jare lange vriendskap.
In ’n gedig wat Terre’Blanche vir Venter geskryf het, sê hy: “Jy is my Elsa, my wyfieleeu, sielsmaat, getrou, vriendin van die eeu...”
“Martie was sy vrou by die huis en ek was sy ander vrou, sy kuier-vrou,” sê Venter.
“Hy het na my toe gekom as hy wou ontspan en kuier.”
Volgens haar het hulle die vier jaar voor Terre’Blanche se dood op 3?April 2010 minstens een keer per dag oor die telefoon gesels en tot een keer per maand saam gekuier.
Sy sê hulle het in 1987 al ontmoet en nog beter vriende geword toe hy in 2003 tronk toe gestuur is.
“Hy het baie vir my geskryf en baie mense het gedink ons het ’n verhouding.
“Selfs sy vrou het so gedink. Ek en Mart was nie pêlle nie,” sê Venter. Sy sê Martie Terre’Blanche het jare al geweet van hul verbintenis.
Mev. Terre’Blanche het aan Rapport bevestig dat haar man en Venter “sielsgenote” was.
Venter sê sy het Terre’Blanche ontmoet kort nadat sy en haar vriendinne ’n berig in Rapport gelees het oor watter mans “soenbaar” en “onsoenbaar” is.
“Anders as my vriende het ek gedink hy ís soenbaar.” Sy het Terre’Blanche gebel terwyl hy besig was om TV te kyk.
“Hy het my goed gevloek en gesê ek moet sy skakelpersoon bel,” sê Venter.
Kort daarna het Terre’Blanche haar egter self teruggebel en gesê: “Ek like jou guts.” Hy het voorgestel dat hulle by die Pretoriase stadsaal ontmoet.
“Hy het daar reguit na my toe gestap en my ’n soen gegee. Toe sê hy vir my vriendinne hulle moet hul weddenskap-geld betaal.”
Venter het toe by die AWB aangesluit en dié organisasie het haar huis in Pretoria as hoofkantoor gebruik.
Sy sê sy en Terre’Blanche het ’n paar keer ’n kamer gedeel en selfs een slag – toe sy hom “teen ’n ander vrou moes beskerm” – ’n bed.
“Ek was in volle uniform langs Eugène in die bed terwyl twee wagte buite in die gang gestaan het. Ek het baie gedink: Moet ek nie vir hom gaan nie?
“Ek het vir hom gesê hy moet nie met sy mooi blou oë vir my kyk nie – netnou sê ek ja.”
Venter glo Terre’Blanche het ’n ligte beroerte gehad toe hy kort voor sy dood ’n hartoperasie ondergaan het. Hy was daarna vergeetagtig en die een kant van sy gesig het effens gehang.
“Hy het die week voor sy dood gesê hy is nie meer ’n man nie, dat hy useless is,” sê Venter.
Sy het nooit gedink Terre’Blanche is ’n baie seksuele persoon nie. Hoewel vroue “vir hom ogies gemaak het”, het hy dit nooit verder gevoer nie.
“Hy was mal oor mooi vroue en hulle het sy ego gestreel, maar hy het nooit rondgeslaap nie. Ek mis hom verskriklik baie,” sê Venter.
Sy is ’n vryskutjoernalis en rig atletiek af vir laerskoolkinders in Lydenburg.
Regter John Horn het die afgelope week beslis uitwysings wat deur die minderjarige moordverdagte gedoen is, mag nie as bewys in die hof dien nie.
Kapt. Mojalefa Nkosi, wat die uitwysings behartig het, het getuig Chris Mahlangu (31), die ander beskuldigde, het erken hy het Terre’Blanche met ’n ysterpyp oor die kop geslaan terwyl hy lê en slaap het.
Die verhoor word op 10 April hervat.
Volg Nuus24 op Twitter
- Rapport