Terpentyn eis byna babameisie
2009-11-10 06:37
Welkom - ’n Babameisie van 18 maande is gelukkig om te leef nadat sy ’n sluk terpentyn gevat het.
Dampe van die terpentyn het haar longetjies beskadig en sy word in die Bongani-hospitaal in die stad behandel.
Terwyl sy om haar lewe geveg het, moes haar ouers met die Welkom-Medi-Clinic stoei wat eers R12 000 wou hê voordat hulle haar verder behandel.
Mervin Scheepers, klein Anchenique se pa, sê hy was Vrydagmiddag besig om rame te verf en die bottel terpentyn het op die grond gestaan. Anchenique het daar rondgespeel.
Sy het, sonder dat iemand dit gesien het, die bottel opgetel en dit die huis ingedra.
Daar het haar ma Anna-Lee gesien net toe sy ’n sluk wou vat. “Ek het dit uit haar hand gestamp, maar dit was te laat, sy het reeds van die terpentyn ingekry,” het Scheepers gesê.
Anchenique se ogies het omgedop en was slaperig. Hulle het met haar na die Welkom-Medi-Clinic gejaag.
Daar is sy gestabiliseer, maar haar ouers moes dadelik R1 500 betaal omdat Anchenique nog nie op haar pa se siekefonds is nie.
Mervin Scheepers sê sy dogter is daarna in ’n saal opgeneem, maar daar is vir hulle gesê hulle moet eers R12 000 betaal voordat sy verder behandel kan word.
“Dit was ná 20:00. Waar moes ons die geld kry? Ons sou dit eers die volgende oggend kon betaal.”
Die hospitaal het egter volgehou dat sy na die Bongani-hospitaal oorgeplaas moes word.
“Ons het wonderlike diens by Bongani gekry. Die dokter het vir ons by noodgevalle gestaan en wag. Hy het dadelik Anchenique se hempie, wat nog erg na terpentyn geruik het, uitgetrek, want sy het nog die hele tyd die dampe ingeasem.”
Die Scheepers-egpaar het net lof vir die diens wat hulle sedertdien by Bongani ontvang. “Dit gaan onder die omstandighede goed met haar. Die dokters sê dit lyk asof haar longe beskadig is, maar tyd sal leer. Sy haal al sonder die suurstof asem en sit met tye regop. Gistermiddag het sy begin rondstap.”
Anna-Lee Scheepers sê verskeie gebedsgroepe bid vir Anchenique en sy glo dit is wat haar soveel beter gemaak het.
Sy sê die belangrikste les wat hulle geleer het, is om nooit vir jou kind enigiets te gee om te drink nadat die kind terpentyn of enige ander gif gedrink het nie.
Frans van Niekerk, hospitaalbestuurder van Welkom-Medi-Clinic, sê die hospitaal het ’n streng beleid dat alle pasiënte in die noodsentrum volgens internasionale standaarde gestabiliseer word. Die bogenoemde geval is as sulks hanteer.
“Vanweë teenstrydige inligting en pasiëntvertroulikheid is ons nie by magte om die aangeleentheid in die media te bespreek nie.”
- Volksblad