Teistering van boere 'afgryslik'
2011-08-10 18:00
Kaapstad – Dit is onaanvaarbaar dat die boere van Suid-Afrika wat die publiek van kos voorsien en die ruggraat van die landelike ekonomie is, deur plaasmoorde getreiter word.
Só sê Japie Grobler, voorsitter van die Agri Securitas-trustfonds wat gemoeid is met landelike ontwikkeling.
“Dit vervul met afgryse om gereeld te hoor hoe mede-boere wreedaardig vermoor en hul geliefdes barbaars verkrag word. Alles moontlik moet gedoen word om die boeregemeenskap teen hierdie weersinwekkende dade te beskerm,” sê Grobler.
Grobler sê ook dat landboukundiges ’n bate en kundigheidspoel van die land is wat gewaardeer en beskerm moet word.
Die Trustfonds poog om die landbougemeenskap te ondersteun deur projekte, soos die onlangse bewilliging aan die Berg-landbouvereniging van Delportshoop in die Noord-Kaap vir die oprigting van ’n radioherhaler.
Dié herhaler sal radiokommunikasie tussen boere in die omgewing verbeter en hulle in staat stel om in noodgevalle hulp te ontbied. Landlynkommunikasie in dié omgewing bestaan amper nie meer nie en selfoonontvangs is swak.
– Lees meer by Landbou.com
– Volg Nuus24 op Twitter