Teenstanders van inligtingswet ‘is dom, liberale snobs’
2011-12-03 09:01
Kaapstad – Die aandrang op ’n openbarebelang-verweer in die Wetsontwerp op die Beskerming van Inligting is niks anders as “dom, liberale snobisme” nie.
Dít is die mening van dr. Mathole Motshekga, ANC-hoofsweep, in die aanlyn-nuusbrief van die regerende party, ANC Today.
Volgens Motshekga is “openbare belang” in die konteks van die wetsontwerp “ongeloofwaardig, onlogies, onduidelik, arbitrêr, vaag en elasties”.
“Die voorstanders daarvan het geen duidelike, streng definisie aangebied oor presies waarop dié kwansuis prysenswaardige konsep van toepassing is nie.
“Die voorstanders veronderstel dat openbare belang van toepassing is teen dit wat hulle verafsku. Dit is niks anders as dom, liberale snobisme nie.”
Volgens Motshekga was en is die ANC se mening steeds dat die insluiting van só ’n klousule in die vorm waarin dit voorgestel is en waarvoor in die media voorbrand gemaak is, Suid-Afrika die enigste staat ter wêreld sonder staatsveiligheid sal maak.
“Met ander woorde, die insluiting van die klousule sal die staat se magte verswak om aandag te gee aan die onwettige besit van geklassifiseerde staatsinligting.
“Ek is nie bewus van enige land wat enigiemand anders as gekeurde inligtingsagente toelaat om geklassifiseerde materiaal te besit nie.”
Intussen beoog die tweede parlementêre ad hoc-komitee oor dié wetsontwerp om sy werksaamhede in April aanstaande jaar af te handel. Altesaam 15 LP’s sal dien in dié komitee van die Nasionale Raad van Provinsies. Hiervan is tien ANC-LP’s, twee van die DA en een elk van Cope, die IVP en die OD.
Die ANC-lede is Reseriti Tau, Siphiwe Mazosiwe, Lewis Nzimande, Harry Mofokeng, Amos Matila en Teboho Chaane, asook Nosipho Ntwanambi, Grace Boroto, Daphne Rantho en Masefako Dikgale. Alf Lees en Darryl Worth sal die DA verteenwoordig.
Die ander lede is Dennis Bloem (Cope), Prince Zulu (IVP) en Johannes Gunda (OD). Die Nasionale Vergadering het die wetsontwerp onlangs met 229 stemme teenoor 107 aanvaar.
Volg Nuus24 op Twitter.
- Die Burger