Te koop: leierskap van die ANC-jeugliga
2011-06-12 08:04
Die ANC-jeugliga is ’n invloedryke drukgroep binne die regerende party – en ook ’n geldmaakmasjien soos min vir sy lede.
Vra maar vir Julius Malema. ’n Jaar nadat Malema in 2008 die president van die jeugliga geword het, het hy ’n maandelikse salaris van sowat R42 000 verdien.
Hy het egter baie meer rojaal geleef as wat sy salaris ’n mens sou laat verwag – en vrae het ontstaan oor waar die geld vir dié leefstyl vandaan gekom het.
Een antwoord is glo SGL, ’n ingenieursfirma waarby Malema betrek word.
SGL en sy sustermaatskappye het na bewering tenders losgeslaan danksy Malema se politieke posisie.
Onlangs het Malema se neef, Tshepo Malema, ’n tender van R44 miljoen gekry sonder om die regte prosedures te volg.
Daar word nou beweer dat dié tender Malema se veldtog om weer as jeugleier verkies te word, moet finansier. Die leierskapverkiesing vind plaas op die jeugliga-kongres wat Donderdag in Midrand begin.
Volgens City Press, Rapport se susterkoerant, se inligting moet ’n leierskapkandidaat van die ANC-jeugliga bereid wees om tot R30 miljoen te bestee om stemme binne die jeugliga te koop.
Ook Pule Mabe, tesourier van die jeugliga, lag al die pad bank toe. Ses maande nadat hy as ’n werker weg is by Metrorail het sy maatskappy, KG Media, ’n gratis koerant begin wat aan pendelaars versprei word.
Dié koerant is aan hom toegeken sonder dat enige tenderprosedures gevolg is. Pule verdien baie geld uit die koerant se advertensieverkope.
Die nasionale jeugontwikkelingsagentskap (NYDA) en sy provinsiale adviesrade – waarvan jeugligalede en hul vriende die personeelkorps uitmaak – is nóg ’n storie.
Andile Lungisa, Malema se adjunk en hoof van NYDA, verdien R800 000 per jaar.
Steven Ngobeni, uitvoerende hoof van NYDA en adjunk-sekretaris-generaal van die jeugliga, verdien R1,8 miljoen per jaar.
Verder is die 63 lede van die provinsiale adviesrade ook jeugliga-lede en elke provinsiale voorsitter verdien R700 000 per jaar en hul adjunkte R500 000.
Stemafgevaardigdes by die jeugliga se kieskongresse kry dikwels omkoopgeld van tot R100 000 per persoon om vir iemand te stem, het voormalige jeugleiers aan City Press gesê.
Sowat 13 leiers van oor Limpopo heen wat deelgeneem het aan die 2008-kongres in Mangaung en verlede jaar se provinsiale kongres in Makhado sê nasionale presidensiële kandidate samel gewoonlik sowat R30 miljoen in nét om stemme te koop.
Volgens hulle word die geld gebruik om “geskenke” te koop vir invloedryke takvoorsitters en ander provinsiale leiers wat vir hulle stemme kan inoes.
Een leier, wat persoonlik gehelp het om afgevaardigdes in Mangaung om te koop, sê: “Ons gee elke afgevaardigde tot R5 000 per dag vir vermaak.
“As jy ’n hoof-stemwerwer is by ’n nasionale kongres, kan jy tot R100 000 verdien as jy 50 afgevaardigdes se stemme inbring. Om ’n nasionale jeugligakongres te wen, het jy sowat R30 miljoen nodig. Dit is duur.”
- Volg Nuus24 op Twitter.
- Rapport