Taxi’s ná slagting vasgevat
2011-12-12 07:35
Pieter Steyn en Maryke Swart
Bloemfontein – Alle minibus-taxi’s wat voortaan deur die Vrystaat ry, sal deur die polisie afgetrek word en die bestuurder sal in hegtenis geneem word as die taxi oorlaai is.
Só sê Butana Komphela, Vrystaatse LUR vir polisie, paaie en vervoer, ná die grusame botsing naby Harrismith waarin 30 mense dood is.
“Ek het gister die opdrag aan die provinsiale polisiekommissaris gegee. Al is daar net één persoon te veel in die taxi, sal die bestuurder in hegtenis geneem word.”
Chaos het Saterdag en Sondag in die Thebe-hospitaal op Harrismith geheers toe sewe oorlewendes van die botsing in dié hospitaal behandel moes word.
Onder die oorlewendes is ’n 18 maande oue baba wat verskeie frakture opgedoen het en Sondag deur City Press as die “wonderwerk-baba” beskryf is.
Dié seuntjie is Sondag met veelvoudige frakture na die Manapo-streekhospitaal in Qwaqwa oorgeplaas. Hospitaalpersoneel is erg bekommerd oor hom. Niemand kon bevestig of sy ouers onder die oorledenes is nie.
Die ongeluk was Saterdag omstreeks 03:00 toe ’n oorlaaide minibus reg van voor teen ’n vragmotor gebots het.
Volgens sers. Mmako Mophiring, polisiewoordvoerder, het die taxi 35 passasiers vervoer, 12 meer as die toegelate 23.
Die bestuurder het glo beheer oor die taxi verloor en om ’n draai teen die vragmotor gebots.
Die taxi was glo van Rustenburg in Noordwes na Tsolo in die Oos-Kaap onderweg.
Ses van die oorlewendes is ernstig beseer en na ander hospitale in die provinsie, onder meer die Pelonomi-hospitaal in Bloemfontein en die Qwaqwa-hospitaal, oorgeplaas.
Nico van Burick van Landbouweekblad het verby die ongelukstoneel gery en gesê dit het soos ’n slagveld gelyk.
“Dooie hoenders en besittings van die insittendes het gestrooi gelê,” het Van Burick gesê.
Tien kinders van verskeie ouderdomme was onder die oorledenes. ’n Passasier van die vragmotor is ook oorlede.
Die vragmotorbestuurder, Bheki Dladla, is ook beseer, maar is intussen ontslaan.
Die ongeluk, wat deur nooddienswerkers as van die grusaamste nóg beskryf is, kom enkele dae ná die begin van die veldtog Kom Veilig Daar.
Die minister van vervoer, Sibusiso Ndebele, het in ’n verklaring sy meegevoel met die oorledenes se familie uitgespreek.
“Sedert 28 November is 21 383 boetes uitgereik en 220 motoriste in hegtenis geneem vir verskeie oortredings,” lui die verklaring.
Komphela het gesê verkeersbeamptes en die polisie het opdrag gekry om bestuurders te ondervra oor hoe lank hulle aaneen ry.
“As ’n bestuurder langer as twee uur of 200 km aaneen ry, sal hy gedwing word om te rus en mag hy nie verder ry nie,” het Komphela gesê.
– Volg Nuus24 op Twitter
- Volksblad