Taximan vas na hy vir polisie lieg

2010-01-15 19:45

Kaapstad - Die bestuurder van ‘n minibus-taxi, wat ‘n skietaanval op Oujaarsaand oorleef het, staan tereg op ‘n aanklag van dwarsboming van die gereg nadat hy valse inligting aan die polisie verskaf het.

Dié taxibestuurder het by tye van die skietvoorval aan die polisie gesê dat daar geen passasiers in sy voertuig was nie.

Landdros Erick Louw het die aangeklaagde, Alwyn Volkwyn, op borgtog van R400 vrygelaat nadat hy Vrydag sy eerste verskyning in die Kaapstadse landdroshof gemaak het.

Volkwyn het buitelandse toeriste as betalende passasiers in sy minibus vervoer, toe skote na die voertuig gevuur is.

Xolisile Pelisane, die aanklaer in die saak, het beweer dat Volkwyn nie oor die nodige permit beskik het wat hom sou toelaat om passasiers vir ‘n geldelike beloning te vervoer nie.

In ‘n verdere ondersoek het dit later aan die lig gekom dat hy toeriste, wat intussen teruggekeer het na die buiteland, as passasiers vervoer het.

Volkwyn is gewaarsku om op 12 Februarie weer in die hof te verskyn.

- Sapa