Taximan ry ook kind om
2011-09-24 09:02
Pauli van Wyk en Jacques Steenkamp
Johannesburg - ’n Sewejarige seun het moontlik breinskade nadat die taxibestuurder wat ’n Johannesburgse advokaat onlangs glo honderde meters ver gesleep het hom twee maande gelede raak gery het.
Matome Thamage (30) het Vrydagoggend in ’n beëdigde verklaring aan ’n prokureursfirma wat namens die Padongelukkefonds (POF) optree, erken hy het Omphemetse Edward Mathobela op 19 Julie in Diepsloot, noord van Johannesburg, raak gery.
Luidens mediese verslae in Beeld se besit het die kind skedelbreuk opgedoen.
In dieselfde verklaring het Thamage ook erken hy is in aanhouding omdat hy adv. Kim McCusker (25) raak gery het.
Hy het die verklaring afgelê voordat sy borgtog van R5 000, wat Donderdag aan hom toegestaan is, betaal is en hy vrygelaat is.
Hy moet in November weer vir die McCusker-saak in die Randburgse landdroshof verskyn.
Die POF is betrek weens ’n mediese eis van die Steve Biko-hospitaal in Pretoria waar Omphemetse geopereer is om bloeding op die brein te verlig.
Luidens sy verklaring het Thamage weggetrek nadat hy passasiers opgelaai het.
Hy het ’n slag gehoor, waarna hy stilgehou het om ondersoek in te stel.
Die skoolkind het langs die taxi se linkervoorwiel gelê.
“Die voetganger (Omphemetse) is aan die kop beseer, maar daar was geen wond nie,” lui die verklaring.
“Hy het vir my gesê hy het pyn en daar het bloed by sy neus uitgekom.”
Thamage het Omphemetse na die brandweerstasie geneem en daar die seuntjie se oupa, Herman Mathobela, gebel.
Die seun is daarna in die Kalafong-hospitaal in Atteridgeville, wes van Pretoria, opgeneem.
Luidens Thamage se verklaring het die polisie nooit die saak ondersoek of sy verklaring geneem nie, al het hy die ongeluk self by die Diepsloot-polisiekantoor aangemeld.
Konst. Naudé Mathe, ondersoekbeampte in die McCusker-saak, het Woensdag getuig Thamage word nie in ander strafsake vervolg nie.
Ao. Balan Muthan, polisiewoordvoerder, het gesê die ondersoekbeampte wag nog op die uitslae van Thamage se vingerafdrukke, wat volgens hom ’n ruk kan duur, voordat hulle sal weet van vorige veroordelings waarin Thamage met ’n motor betrokke was.
Omphemetse is in die sorg van sy oupa, wat in Diepsloot woon.
Sy ma, Ruth Mathobela, is ’n leerlingverpleegster in die Cosmos-hospitaal by eMalahleni (Witbank).
“Die aand van my seun se ongeluk was ek ontsettend geskok,” het me. Mathobela aan Beeld gesê.
“Ek het die hele nag deur gehuil en niks geslaap nie. Ek kan nie glo hy het nóg iemand raak gery nie.”
Volgens me. Mathobela moet Omphemetse volgende week na die Steve Biko-hospitaal in Pretoria terugkeer.
“Die dokters het gesê Omphemetse het bloeding en water op die brein van die ongeluk en sal waarskynlik breinskade oorhou.
“Dié bloederigheid is op 17 Augustus in ’n operasie gedreineer, maar nou moet hy teruggaan. Ek het nie geld nie,” het sy in trane gesê.
Volg Nuus24 op Twitter.
- Beeld