Taxidrywer hardloop weg vir polisie
2009-11-20 16:46
Johannesburg - 'n Taxibestuurder het skynbaar só min vertroue in sy voertuig se padwaardigheid gehad dat hy weggehardloop het toe hy die polisie gewaar.
Die polisie in Tshwane het sedert Vrydagoggend beslag gelê op een en dertig voertuie, waaronder 29 onpadwaardige taxi's, as deel van 'n padveiligheidveldtog in die gebied.
"Een bestuurder het sy voertuig gelos en weggehardloop vir die polisie," het insp. Sello Mangena van die Temba-polisie gesê.
Die voertuie is in die Mabopane en Soshanguve-areas vasgetrek as deel van die Hamba Ubatshele-veldtog.
Hamba Ubatshele is Vrydag van stapel gestuur en sal tot in Januarie voortduur, het insp. Sello Mangena van die Temba-polisie gesê.
Die veldtog se naam beteken 'gaan sê vir hulle.'
Agt en twintig bestuurders is in hegtenis geneem omdat hulle voertuie onpadwaardig was of omdat hulle sonder 'n lisensie bestuur het.
Die polisie het ook beslag gelê op twee gesteelde voertuie, 'n Volkswagen Fox en 'n Toyota Corolla. Die bestuurders is in hegtenis geneem.
- Sapa