Taxi-man glo talle kere só oor treinspoor
2010-08-29 06:42
Kaapstad - Die taxibestuurder wat die bussie bestuur het waarin tien kinders
gesterf het toe hy voor ’n trein ingejaag het, het gereeld die
waarskuwingstekens en valboom by dié spooroorgang geïgnoreer.
Een van slegs vier kinders wat dié grusame ongeluk oorleef het, het
Vrydag vertel hoe Jacob Humphreys “byna elke oggend” op
soortgelyke wyse tussen die valbome, wat slegs die helfte van die pad
afsper, deurgevleg het.
Luciano de Koker (16) sê dit was daarom nie vir hulle snaaks toe
Humphreys Woensdagoggend wéér verby die ry motors gejaag het wat reeds
by die valboom in Buttskopweg in Blackheath naby Bellville gewag het
nie.
“Ons almal kon daai oggend sien hoe naby die trein was.”
Luciano sê al wat hy van die oomblikke vóór die ongeluk onthou, is hoe stil dit in die taxi was.
“Niemand het eens geskreeu nie.”
Luciano se sussie, die 11-jarige Michaelien, wat agter in die taxi langs ’n maatjie gesit het, is op slag dood.
“Dis ’n miracle dat ek oorleef het. Ek kan dit nog nie glo nie.”
Humphreys, wat tans in die Netcare Kuilsrivier-hospitaal aansterk,
word nou deur tien klagte van strafbare manslag in die gesig gestaar.
Die polisie sê dié klagte kan in moord verander word as ’n element van opset in sy optrede aanwesig was.
Sy vrou, Lynn, het Vrydag gesê haar man “se hart is dood van die pyn vir die kinders”.
“Hy trek swaar en praat niks. Die dood van die kinders is alles
baie hartseer. Dis ’n swart tyd vir ons familie, maar ons vertrou op die
Here.”
- Rapport