'Talle vrae oor Leigh-moord nog onbeantwoord'
2012-02-02 06:56
Johannesburg – Daar is steeds talle onbeantwoorde vrae oor die moord op me. Leigh Matthews, het haar ouers Woensdag gesê nadat haar moordenaar se aansoek om ’n herverhoor van die hand gewys is.
“Ons sal graag wil weet waar sy daardie 12dae was, maar hy (Donovan Moodley) sal seker nooit vir ons sê nie,” het Sharon Matthews gesê.
Regter Joop Labuschagne het in sy uitspraak in die hooggeregshof in Johannesburg gesê Moodley se “ware storie” oor Matthews se moord is deurspek met onwaarskynlikhede en is ’n desperate poging van ’n man wat voel hoe die “skoen knyp in sy huidige omstandighede”.
Moodley het oorspronklik skuld beken op aanklagte van menseroof en moord op Matthews en die afpersing van haar pa, Rob.
Hy het Matthews op 9 Julie 2004 by die Bond-universiteit in Sandton ontvoer. Haar lyk is op 21 Julie by Walkerville, suid van Johannesburg, gekry.
Verlede week het Moodley aangevoer hy het gelieg omdat brig. Piet Byleveld, ondersoekbeampte in die saak, hom gedwing het om ’n bekentenis af te lê. Hy het ook aangevoer die ondersoek is gedokter sodat niemand die “ware storie” sou hoor nie.
Die waarheid is volgens Moodley dat drie dwelmsmouse hom gedreig het om by Matthews se ontvoering betrokke te raak en dat hy moes toekyk hoe een van hulle, slegs bekend as Jemba, haar doodskiet.
Labuschagne het gevra: “Hoekom sou die gevaarlike drie dwelmsmouse juis Moodley nader om hulle met ’n ontvoering by te staan? Hoekom sou die drie mans me. Matthews voor Moodley doodmaak en hom eenvoudig vrylaat? Met van dié feite kan ek net vind dat Moodley se weergawe van die drie dwelmhandelaars onwaar is.”
Labuschagne het bevind dat Moodley se huidige aansoek, wat vyfjaar en 348 dae ná sy skuldigbevinding gebring is, jare te laat is. “Na my mening is die aansoek ’n desperate poging deur Moodley, nie om die waarheid te ontbloot nie, maar eerder om daarvan weg te hardloop.”
Ná die uitspraak het Moodley sy ma, Mary, gesoen en weer terug na die aanhoudingselle gestap.
Byleveld het ná die uitspraak gesê: “Die saak sal altyd onbeantwoorde vrae hê.”
Hy is bereid om die ondersoek enige tyd te hervat indien nuwe inligting na vore kom.
Advv. Zaais van Zyl, staatsaanklaer, en Mthunzi Mhaga, woordvoerder van die nasionale vervolgingsgesag, het bevestig dat ’n provinsiale span speurders nou ondersoek instel of ander mense by die moord betrokke was.
– Volg Nuus24 op Twitter
- Beeld