Talle uit water gered ná donderstorms in Jhb
2011-03-21 07:09
Toe ’n Gautengse polisieman twee kindertjies hoor skreeu, is hy die kolkende vloedwater in om hulle na veiligheid te bring.
Dit was een van die dramatiese tonele wat hulle afgespeel het toe verskeie mense ná gistermiddag se donderstorms oor Johannesburg uit vloedwater onder ’n treinbrug in Soweto gered is.
“Ek het self twee kinders en het nie twee keer gedink nie,” het ao. Paul Fern, sektorpolisiëringsbeampte van die Florida-polisiekantoor aan die Wes-Rand, gister aan Beeld vertel.
Die drama het begin toe Sipho Mazibuko (42), Sipho Majola (51) en Dlomo Ntozakhe met Mazibuko se wit Nissan Hi-Rider-bakkie in Canadaweg uit Soweto op pad in die rigting van Johannesburg was.
Hulle het ’n taxi gesien wat onder ’n treinbrug vasgesit het.
Die taxibestuurder was bo-op die taxi se dak.
“Die taxibestuurder het my gevra om hom te help. Mense het binne die taxi geskree terwyl die water bly opstoot!” het Mazibuko gesê.
Mazibuko het met sy bakkie tot voor die taxi ingery, wat toe self gestol en vasgesit het.
Mazibuko en Majola wou die bakkie nog uit die water stoot toe dit skielik baie harder begin reën en die stormwatervlak vinnig gestyg het.
Hulle was toe self in die moeilikheid.
Ntozakhe, wat nie kan swem nie, het deur ’n venster uit die bakkie se kajuit geklim en ’n paal vasgegryp en bly klou.
Mazibuko en Majola het toe agter op die bak geklim.
Ook hulle het geklou vir wat hulle werd is terwyl die stroom die bakkie sowat 200 m ver meegesleur het.
“Die water het tot onder ons nekke opgestoot. Toe ons nader aan die treinbrug kom het ons aan die ysterstellasies gegryp.
Die bakkie het diep onder die water verdwyn,” het Mazibuko vertel.
Nooddienswerkers van Johannesburg het opgedaag en die mense in die taxi en die taxibestuurder gered.
Hulle het ’n tou na Mazibuko en Majola uitgegooi, waarmee die mans hulle moes vasmaak.
Hulle is daarna opgehys en gered.
Teen dié tyd het Themba Tsotetsi van Klipspruit saam met sy pa (naam onbekend) en sy dogter, Lwandile (8), en sy seun, Ntando (4), reeds ook met húl Isuzu-bakkie in die water vasgesit.
Toe Fern op die toneel opdaag en die kinders hoor skree, het hy ingespring en eers Ntando na veiligheid gedra en drie keer teruggegaan om Lwandile, toe haar oupa en toe haar pa te gaan haal.
Nana Radebe, woordvoerder van Johannesburg se nooddienste, sê terwyl reddingswerkers saam met Netcare 911 mense uit die water gered het, het Ntozakhe steeds vir al wat hy werd is aan die paal vasgeklou.
Reddingswerkers van Johannesburg se waterreddingspan het opgedaag en Ntozakhe met ’n tou uit die sterk waterstroom getrek.
Ntozakhe is na die Chris Hani Baragwanath-hospitaal in Soweto gebring waar hy volgens Radebe vir koors en ontbering behandel is.
Die Nissan-bakkie het heeltemal onder die water verdwyn.
Hoewel niemand dood of ernstig beseer is nie, sê Mazibuko dit was ’n groot terugslag vir hom.
“Ek is nie oukei nie. My bakkie is steeds onder die water met al my goed in.”
- Volg Nuus24 op Twitter.
- Beeld