Talle tronkvoëls loop dalk gou vry
2011-08-14 08:05
Johannesburg - Die tronkdeure kan dalk binnekort oopgaan vir duisende gevangenes wat tans lewenslange vonnisse uitdien weens moord en ander ernstige misdade.
Altesame 361 “lifers”, soos hulle in die tronkstelsel bekend staan, word met onmiddellike effek vir parool oorweeg, luidens ’n interne memorandum van die departement van korrektiewe dienste wat Rapport die afgelope week gesien het.
Teoreties kan berugte gevangenes soos Eugène de Kock, Vlakplaas-bevelvoerder; Jano en Riku Nortjé, die “tasmoord”-broers; en Stewart “Boetie Boer” Wilken, Oos-Kaapse reeksmoordenaar, dus vrygelaat word.
Ook Ferdi Barnard, operateur van die berugte Burgerlike Samewerkingsburo (BSB) wat in 1998 skuldig bevind is aan die moord op die aktivis dr. David Webster, kan in aanmerking kom.
Die nuwe paroolbedeling is van toepassing op misdadigers wat voor Oktober 2004 gevonnis is.
Een van dié “lifers”, Cornelius van Wyk, het verlede maand die hooggeregshof in Pretoria genader oor die “onregverdigheid” dat hulle nie soos ander gevangenes punte ter erkenning van goeie gedrag en vaardigheidskursusse kon verdien nie.
Dié punte verminder prakties die tronkstraftermyn.
Waarnemende regter Jan Hiemstra het dié praktyk ongrondwetlik verklaar. Dit beteken dat Van Wyk en ander gevangenes wat in dié kategorie val nie meer hul volle 20 jaar hoef uit te dien voordat hulle vir parool in aanmerking kan kom nie.
Misdadigers wat deesdae tot lewenslange tronkstraf gevonnis word, moet minstens 25 jaar daarvan uitdien.
Na aanleiding van die uitspraak het korrektiewe dienste sy nuwe beleid in die memorandum uiteengesit en verklaar al dié “lifers” kan outomaties die maksimum aantal punte vir goeie gedrag ontvang. Hulle almal kom dus nou ná 13 jaar vir parool in aanmerking.
Luidens die memorandum moet nog 41 ander “lifers” teen einde Augustus vir parool oorweeg word en nóg 4 267 kort daarna soos wat hul 13 jaar en agt maande verbygaan.
Van die mense wat by die nuwe bedeling sal baat vind, is die eerste terdoodveroordeelde wat die galg vrygespring het toe die doodstraf afgeskaf is. Themba Makwanyane het twee werknemers van die destydse Volkskas-bank en twee polisielede in ’n rooftog vermoor.
Die konstitusionele hof het in 1995 in sy saak die doodstraf afgeskaf en sy vonnis in lewenslange tronkstraf verander. Hy kom onmiddellik vir parool in aanmerking.
In De Kock se geval hoop hy al lank op presidensiële kwytskelding. Nou kan hy vir parool in aanmerking kom omdat die hof destyds gelas het dat sy sewe lewenslange vonnisse en 212 jaar tronkstraf samelopend uitgedien word.
Regter Chris Jansen het in 1997 vir “Boetie Boer” gesê hy sou hom die doodstraf opgelê het as hy kon weens sy moorde op prostitute en seuns in die Port Elizabeth-omgewing.
Die broers Riku en Jano Nortjé is tot lewenslange tronkstraf gevonnis weens die moord op Engel Bakker (76), ’n familievriend. Hulle het sy lyk in ses dele opgesny, in tasse gepak en dit by ’n trein se venster uitgegooi toe die tasse begin lek het.
Luidens die memorandum van korrektiewe dienste sal die families van die slagoffers egter ook insae in die paroolproses hê en word vrylating nie gewaarborg nie.
Volg Nuus24 op Twitter.
- Rapport