Talle modelle ingeloop, besteel
2011-05-04 08:21
Bloemfontein – Jong Bloemfonteinse modelle is bedrieg en besteel nadat ’n man wat hom voorgedoen het as ’n SAUK-werknemer hulle na Johannesburg gelok het met beloftes van groot geld en roem.
Janné Fouché (20), ’n eerstejaar-sielkundestudent aan die Universiteit van die Vrystaat, Jacqueline Nell, Boipelo Malope en Gaopalelwe Mototo is oudisies aangebied as aanbieders van die musiekprogram Live op SABC1.
Die man, ene Thomas Bester, het die vier, almal van die agentskap Euphoria Model Management, “gekies” ná onderhoude by die plaaslike Adelante-gastehuis.
Hulle is per bus Johannesburg toe en het by die Dalberry-gastehuis in Fourways oornag.
Bester het hulle Sondag geld gevra om vir hul demonstrasievideo’s vir die oudisie te skiet.
Fouché het lont geruik en gesê sy het nie die geld nie. “Toe freak hy heeltemal uit.”
Bester het hulle na die Rosebank-winkelsentrum geneem onder die voorwendsel dat hy vir hulle klere sou koop vir die oudisie.
By die sentrum het hy aangebied om hul skootrekenaars by die gastehuis te gaan haal. Hy het ook gesê hulle moet hul selfone vir hom gee, sodat hulle kon fokus op die oudisie. Bester het toe verdwyn met hul selfone, kontant en skootrekenaars.
Volgens Fouché kon hulle vriende en familie kontak om hulle te kom haal. Hulle het ook die voorval by die Rosebank-polisiekantoor aangemeld.
Joanita Rheeder, eienaar van die Euphoria Model Management, het gister gesê Bester het eerstehandse kennis van die bedryf.
Sy kon hom Dinsdagoggend op sy selfoon in die hande kry, waarna hy vir haar ’n SMS gestuur het met die boodskap “F** jou”.
Bester het nie die twee gastehuise se rekenings betaal nie.
Vukile Madlala, publisiteitsbestuurder van SABC1, het gesê hulle weet nie van die voorval nie. “Mense moet onthou, as ons aanbieders soek vir ’n program, sal ons dit in die media aankondig.”
Volg Nuus24 op Twitter
- Volksblad