Talle dakloos toe hul hutte afbrand
2011-08-01 09:08
Johannesburg - Honderde mense is die naweek dakloos gelaat nadat ’n verwoestende brand ure lank deur ’n plakkerskamp gewoed en 300 plakkershutte afgebrand het.
Percy Morokane, woordvoerder van die Johannesburgse nooddienste (EMS), het gesê die brand in die Slovopark-plakkerskamp in Coronationville het Vrydag omstreeks 21:00 begin.
“Brandbestryders kon die vuur eers gister (Saterdagoggend) om 02:00 blus,” het hy gesê.
“300 plakkershutte is in puin gelê en 600 mense is haweloos gelaat.”
Volgens Morokane was inspekteurs eergister omstreeks 07:00 al op die toneel om die oorsaak van die brand te bepaal.
“Hulle het deur die puin gesoek en gevind die brand is begin deur die oorlading van ’n onwettige elektriese verbinding.”
Niemand het in die brand gesterf nie.
Jeff Wicks, woordvoerder van Netcare 911, het in ’n verklaring gesê een man het brandwonde aan sy arms opgedoen en is steeds in ’n ernstige toestand in die hospitaal.
Volgens Wicks het die man van sy besittings probeer red toe sy hut in vlamme opgegaan het.
Paramedici het hom op die toneel gestabiliseer en hy is per ambulans vir verdere behandeling na die Helen Joseph-hospitaal geneem.
Morokane het gesê die stad se rampbestuursdirektoraat het gereël dat al die slagoffers van die brand Vrydagnag by ’n laerskool in Coronationville kon slaap.
Van die inwoners het eergistermiddag reeds hul hutte begin herbou.
“Die Coronationville-ontspanningsaal het plek vir 1 000 mense.
“Ons het vir die inwoners gesê almal wat nie slaapplek het nie, is welkom om daar te bly,” het Morokane gesê.
Parks Tau, burgemeester van Johannesburg, het Slovopark Saterdagmiddag besoek.
Matshidiso Mfikoe, Johannesburgse burgemeesterskomiteelid vir openbare veiligheid, het hom vergesel en oor die skade ingelig.
Morokane het gesê Checkers het Saterdag ’n mobiele sopkombuis na Slovopark gestuur wat die inwoners van kos voorsien het.
“Die inwoners van Coronationville het ook in groot getalle opgedaag met warm maaltye,” het hy gesê.
Morokane sê inwoners wat geraak is, het steeds skenkings soos kos, komberse en geld nodig.
Mense wat wil bydra, kan die stad se rampblitslyn bel by 011 375 6009.
Volg Nuus24 op Twitter.
- Beeld