Talle beseer toe drie voertuie opeenhoop

2012-09-20 22:47

Kaapstad – Meer as 20 mense is beseer nadat ‘n taxi, ‘n vragmotor en ‘n bakkie teen mekaar by ‘n kruising in Pietermaritzburg gebots het, het paramedici in KwaZulu-Natal gesê.

Derrick Banks, ‘n woordvoerder vir ER24, het in ‘n verklaring gesê die ongeluk het Donderdagaand by die kruising tussen Murray- en Richmond-weg plaasgevind.

Hy sê drie van die beseerdes het kritieke beserings opgedoen.

Banks sê die taxi het teen die agterkant van die vragmotor gebots. Die bakkie, wat ernstig beskadig is, het ‘n paar meter verder gestaan toe paramedici by die toneel opgedaag het.

Drie mense wat voor in die taxi gesit het, was nog in die voertuig vasgekeer. Hul toestand was kritiek.

Die pasiënte is uit die wrak gesny en op die toneel gestabiliseer. Passasiers van die taxi en bakkie is vir ligte tot ernstige beserings behandel.

Al die pasiënte is op die toneel gestabiliseer en na verskeie hospitale in die stad vir verdere behandeling geneem.

Banks sê die polisie sal die ongeluk ondersoek.

Volg Nuus24 op Twitter   

- Nuus24