Swerwer se humeur laat hom in tronk beland
2011-10-18 19:04
Kaapstad – ‘n Wes-Kaapse swerwer se humeur het tot ‘n vonnis van drie jaar gevangenisstraf vir hom gelei.
Elton Pedro (28) het “beheer verloor” en die bestuurder van ‘n skrootmetaalbesigheid met ‘n byl aangeval, het die Bellville-streekhof Dinsdag gehoor.
Pedro is gevra om die perseel van die handelaar Faivelowitz CC in Elsiesrivier te verlaat, aangesien hy ‘n laspos van homself gemaak het terwyl klante die gebou ingegaan en verlaat het.
Pedro het kwaad geword en gespoeg na die verskaffingsbestuurder, David Faivelowitz. Hy is toe na ‘n huis oorkant die pad, waar hy die byl in ‘n sak weggesteek het.
Hy is agtervolg deur Faivelowitz, wat ‘n hokkiestok as wapen gedra het.
Vernon Ebersohn, Pedro se regshulp-prokureur, het gesê Pedro het sy humeur verloor toe Faivelowitz op hom begin vloek het.
Pedro het gedink dat Faivelowitz op die punt was om hom met die hokkiestok aan te val en het “eerste ingekom” met die byl.
Die aanval het Faivelowitz met ‘n wond aan sy linkerarm gelaat.
Pedro het skuldig gepleit op aanklag van aanranding met die doel om ernstig te beseer. Hy is in die verlede reeds vyf keer skuldig bevind aan ernstige aanranding.
Barry van der Berg, aanklaer, het gevra dat gevangenisstraf opgelê moet word.
Landdros Kenneth Pieterse het gesê Pedro is gelukkig dat Faivelowitz die hou met sy linkerarm kon afweer, want as hy nie kon nie, sou Pedro moontlik van moord aangekla gewees het.
Pieterse het gesê hy hoop die gevangenisstraf sal Pedro oor sy lewe laat nadink en hom laat besef dat geweld hom nêrens sal bring nie.
- Volg Nuus24 op Twitter
- SAPA