Swanger vrou in gru-ongeluk wat sewe eis

2012-12-21 13:26

Bloemfontein – Die bestuurder van 'n motor wat betrokke was in die gru-ongeluk op die N3 buite Warden in die Vrystaat, wat die lewens van sewe mense geëis het, was dalk 'n leerlingbestuurder.

'n Woordvoerder vir die polisie, Mmako Mophiring, het in 'n verklaring gesê dat een van die oorledenes 'n swanger 29-jarige vrou was.

Nog vyf mense is ernstig beseer en in die Hoogland Mediclinic in Bethlehem opgeneem.

Mophiring het gesê die trompop-botsing het omstreeks 05:30 Vrydagoggend sowat 20 km buite Warden plaasgevind.

Hy het gesê 'n ligte voertuig met 'n leerlingbestuurder-plakker en vyf manspassasiers het na bewering voor aankomende verkeer beland en teen 'n voertuig met sewe passasiers gebots.

Die vyf mans in die ligte voertuig is almal dood asook die bestuurder van die ander voertuig.

Die swanger vrou is na 'n hospitaal geneem waar sy later dood verklaar is.

'n Saak van strafbare mansslag word ondersoek.

Volg Nuus24 op Twitter.