Swaar reën maak amok in KZN
2012-12-11 14:21
Johannesburg – Elf mense het tot dusver as gevolg van swaar reënbuie in Durban gesterf, het eThekwini se metropolisie gesê.
Eugene Msomi, ‘n woordvoerder, sê sommige plakkershutte het ineengestort en ander is in Chatsworth se Bayview- informele nedersetting, Welbedacht en Claremont meegesleur.
Die nasionale seereddingsinstituut (NSRI) sê ses kinders en ‘n volwassene word vermis nadat hulle op ‘n eiland in die Umzinto-rivier naby Durban vasgekeer geraak het.
Drie ander mense is by die the iFafa Club Marina-oord, suid van Umzinto, gered.
Nog nege hawelose mense is bevry nadat die Umbilo-rivier in Durban oorstroom het. Die mense het onder die M4-brug – wat oor die rivier strek – geslaap toe die vloedwater hulle vasgekeer het.
Die brandweer, paramedici en die polisie is ingespan om hulle te red.
Intussen is vier mense beseer toe ‘n goederetrein in die Amanzimtoti-rivier naby Durban beland het.
"Die malende rivier het die sand onder die treinspoor geërodeer, wat veroorsaak het dat die trein 'n paar meter na benede in die water gestort het," het Chris Botha, woordvoerder vir Netcare 911, gesê.
Meer as 300 inwoners in Ladysmith, KwaZulu-Natal, se huise is beskadig nadat groot haelstene oor die stad geval het.
Nomusa Dube, LUR vir samewerkende regering, sê miljoene rande sal benodig word om dié mense te help.
Volg Nuus24 op Twitter
- SAPA
