Sutcliffe lag bewerings van arres af
2011-06-20 11:07
Durban – Dr. Mike Sutcliffe, stadsbestuurder van die eThekwini-metroraad, het bewerings dat hy in hegtenis geneem is, afgelag, het Independent Online Maandag berig.
"Ek lewer nie eers kommentaar op sulke bewerings nie. Dit is net laf," het Sutcliffe gesê.
The Tribune het Saterdag 'n oproep van 'n anonieme persoon ontvang wat gevra het of Sutcliffe in hegtenis geneem is. Geen verdere inligting is bekend gemaak nie.
Brig. Phindile Radebe, polisiewoordvoerder, het gesê indien Sutcliffe in hegtenis geneem was, sou sy "definitief" daarvan gehoor het.
Dit is nie die eerste keer dat bewerings oor Sutcliffe se inhegtenisneming rondvlieg nie.
In Maart het koerantberigte beweer dat die Valke Sutcliffe en ander beamptes in hegtenis sal neem te midde 'n ondersoek na beweerde tenderbedrog by die metroraad.
Dit het nooit gebeur nie, en McIntosh Polela, woordvoerder van die Valke, het die inhegtenisnemings ontken.
Volg Nuus24 op Twitter
- SAPA