Survivor-verdagte nog nie in hof
2010-03-09 12:30
Johannesburg – Die twee mans wat glo vier jongmense doodgery het terwyl hulle in Soweto resies gejaag het, het nie soos verwag was Dinsdag in die hof verskyn nie.
Gemeenskapsleier Dlangezwa Mvelase het gesê dat die saak Woensdag in die Protea landdroshof sal begin.
“Ons sal more hier wees om te betoog. Ons wil hulle borgtog teenstaan,” het Myelase gesê.
Die bestuurder van een van die motors was die musikant Jub Jub, ’n deelnemer aan Survivor SA: Santa Carolina Celebrity Challenge.
Die grys Mini Cooper en ’n bloue het volgens insp. Kay Makhubela, polisiewoordvoerder, omstreeks 16:00 in Mdlalosestraat tussen Protea North en Protea Glen resies gejaag.
“Dit is ’n tweerigtingstraat en een van die motors het in die baan van aankomende verkeer gery sodat hulle parallel aan mekaar beweeg het,” het insp. Edna Mamonyane, Johannesburg se metropolisiewoordvoerder, gesê.
Toe ’n motor van voor af kom, het die een Mini na die ander baan teruggeswenk.
Die blou motor het die gryse glo gestamp en dit het gerol, het Makhubela gesê.
Vier seuns, tussen 17 en 19 jaar oud, het saam met vriende op die sypaadjie geloop toe die motors hulle tref. Die vier is op die toneel dood.
Drie van hul vriende is met ernstige beserings, waaronder veelvuldige frakture en kopbeserings, hospitaal toe geneem.
Die twee bestuurders is lig beseer. Hulle is op aanklag van strafbare manslag en roekelose of nalatige bestuur in hegtenis geneem.
Die twee verdagtes staar klagtes van strafbare manslag en nalatige en roekelose bestuur in die gesig.
Sapa – Die Burger