Survivor-deelnemer ry glo vier dood
2010-03-09 08:43
Daniëlla du Plooy
Johannesburg - Vier tieners is Maandag in hul skoolklere doodgery en nog drie ernstig beseer toe hulle voor twee Mini Coopers beland het wat in Soweto resies gejaag het.
Die bestuurder van een die motors was die musikant Jub Jub, ’n deelnemer aan Survivor SA: Santa Carolina Celebrity Challenge.
Die grys Mini Cooper en ’n bloue het volgens insp. Kay Makhubela, polisiewoordvoerder, omstreeks 16:00 in Mdlalosestraat tussen Protea North en Protea Glen resies gejaag.
“Dit is ’n tweerigtingstraat en een van die motors het in die baan van aankomende verkeer gery sodat hulle parallel aan mekaar beweeg het,” het insp. Edna Mamonyane, Johannesburg se metropolisiewoordvoerder, gesê.
Toe ’n motor van voor af kom, het die een Mini na die ander baan teruggeswenk.
Die blou motor het die gryse glo gestamp en dit het gerol, het Makhubela gesê.
Vier seuns, tussen 17 en 19 jaar oud, het saam met vriende op die sypaadjie geloop toe die motors hulle tref. Die vier is op die toneel dood.
Drie van hul vriende is met ernstige beserings, waaronder veelvuldige frakture en kopbeserings, hospitaal toe geneem.
Die twee bestuurders is lig beseer. Hulle is op aanklag van strafbare manslag en roekelose of nalatige bestuur in hegtenis geneem.
’n Ma van een van die seuns het gisteraand verskriklik op die toneel gehuil. Nooddienswerkers het haar opgetel en van toneel af weggedra. Massas mense het geskok op die toneel saamgedrom, waar daar ook ’n brandweerwa en tientalle polisielede was.
Albei wrakke het in ’n sloot langs die pad gelê. Die bloue was so erg verwring dat ’n mens skaars kon glo enigiemand het lewend daaruit gekom.
Die gryse is minder erg beskadig.
Die kinders se skoolsakke het ook langs die pad gelê.
Drie van die slagoffers was leerders van Jules High School in die Johannesburgse middestad en die ander van Altmont High School in Protea North.
Makhubela het gesê die twee bestuurders sal in die hof verskyn sodra hulle behandel is.
- Die Burger