Suidpool toe ter wille van kinders
2011-12-28 08:00
Durban – Ses matrikulante van KwaZulu Natal sal vroeg in Januarie die Antarktiese
koue op sleë gaan aanpak om vroeë kinderontwikkeling in die kollig te
plaas.
Die doel is om vir voorskoolse kinders toegang te gee tot voorskoolse ontwikkelingsprogramme.
Unlimited
Child, ’n nie-regeringsorganisasie (NRO), wat fokus op crèches in die
Vallei van ’n Duisend Heuwels in KwaZulu-Natal, bedryf die projek.
Die
span bestaan uit mnre. Iain, Zack en Barney Buchan, Nzuzo Mnikathi, dr.
Pete Berning en mnr. Dave Pritt (koördineerder van die ekspedisie).
Nzuzo is die jongste lid van die span.
Hulle vertrek Maandag 9
Januarie na Punta Arenas in Chili waar hulle twee dae sal deurbring vir
die laaste opleiding en die nagaan van toerusting. Vandaar vlieg hulle
na die Union Glacier-basiskamp om te akklimatiseer en hul toerusting
finaal na te gaan.
Die span hoop om 14 Januarie hul tog van 111 km te begin.
Afhangende
van die weer en ander uitdagings beplan hulle om tussen 5 en 25 km per
dag te vorder en ’n nag op die Suidpool deur te bring voordat hulle na
Union Glacier terugvlieg.
Me. Christel Liebenberg, woordvoerder
van Unlimited Child, het gesê Buchan sr. het besluit om saam met sy twee
seuns in die voetspore van ontdekkingsreisigers soos Roald Amundsen,
Robert Falcon en Sean Wisedale (die enigste Suid-Afrikaner wat die sewe
hoogste pieke ter wêreld geklim het) te volg en sodoende ook bewustheid
te skep vir The Unlimited Child.
Liebenberg het gesê hulle wou ’n kind wat in die vallei grootgeword het die kans bied om saam te reis.
Nzuzo
se tannie is betrokke by die opleiding van opvoeders by crèches in die
omgewing en hulle het sodoende van hom te hore gekom.
Sy ouers is dood toe hy 9 was en hy is deur sy ouma, me. Ivy Ndlovu, grootgemaak.
“Hy
het empatie met die kinders wat grootword in die Vallei van ’n Duisend
Heuwels (waar kinders nie juis toegang tot voorskoolse programme het
nie). Die kinders kon nie vir ’n beter woordvoerder gevra het nie.”
Die
span se oefenprogram sluit in vier uur per dag se stap, draf en die
trek van ’n 40 kg-gewig om gewoond te raak aan die swaar slee wat elkeen
agter hom aan moet sleep. Die groep raak ook “vrieskas-fiks” om hulle
voor te berei op die ure van alleenheid op die ys.
Volg hul vordering op
www.theunlimitedchild.co.za
Volg Nuus24 op Twitter.
- Beeld