Suid-Afrikaner in Algerië gered

2013-01-24 16:30

Johannesburg – ‘n Suid-Afrikaner is ná ‘n terreuraanval by die Tigantourine-gaskompleks in Algerië gered, het Ebrahim Ebrahim, adjunk-minister van buitelandse sake, gesê.

“Ons het bevestiging gekry dat een Suid-Afrikaanse burger wat deur die Algerynse weermag gered is, veilig in Suid-Afrika is...” het hy in ‘n verklaring gesê.

Luidens die verklaring is die persoon Maandag, 21 Januarie gered.

“Die Suid-Afrikaanse regering het die terreuraanval ten sterkste veroordeel...”

Geen verdere besonderhede is oor die Suid-Afrikaner verskaf nie. Dit is ook nie bekend of hy ‘n gyselaar was nie.

Gewapende rebelle het verlede week ‘n bus oorval wat ingenieurs wat by ‘n gasveld in Algerië gewerk het, vervoer het. Twee mense het gesterf en 41 buitelanders is ontvoer, het AFP berig.

Die rebelle het toe na die gaskompleks gegaan en talle buitelanders en ‘n aantal plaaslike werknemers gyselaar gehou.

Algerië se regering sê 37 buitelanders van agt verskillende nasionaliteite en ‘n Algerynse burger is in die ontvoering dood.

Volg Nuus24 op Twitter

- SAPA