Studente ruk handuit
2009-08-04 06:49
Kaapstad. - Woedende studente van die Kaapse Skiereilandse Universiteit van Tegnologie (KSUT) het gister singend en dansend oor studentegeld op die Kaapstad-kampus betoog.
Die polisie se hulp is ingeroep toe die protesoptrede begin handuit ruk het. Die oproerige studente is met rubberkoeëls geskiet nadat hulle skade aan eiendom aangerig het.
Mnr. Mandi Lakhe, ’n derdejaarstudent in finansiële inligtingstelsels, het gesê die universiteit se snoepwinkel is rot en kaal besteel.
“Die voorraad is vernietig en die geld is weg. Ons administrasiegebou is oorstroom omdat krane oop gelos is. Die studente is woedend omdat hulle nie geld het nie,” het hy gesê.
Twee lede van die studenteraad wat anoniem wil bly, het aan Die Burger gesê die KSUT verwag dat studente R5 000 vir registrasie betaal. “Ons het nie sulke geld nie. Ons soek ’n nuwe visekanselier.”
Prof. Vuyisa Mazwi-Tanga, die visekanselier, moet afgedank word, het ’n lid van die studenteraad gesê.
Volgens mnr. Alwyn van Gensen, registrateur van die KSUT, is net losiesgeld verhoog en is nog geen besluit oor ander gelde geneem nie.
“Ek weet nie waar die studente aan dié bedrag kom nie. Daar is net besluit dat mense wat in die koshuis woon ekstra moet betaal. Hulle het eers R1 800 betaal, maar ons het die prys tot R3 000 verhoog. Dié koste het niks met registrasiegeld of met jaarlikse geld te doen nie,” het Van Gensen gesê.
Die universiteit verwerp die optrede van die studente. “Hulle rig onnodige skade aan en ontwrig klasse.”
Me. Thandi Zakhe, ’n student in openbare bestuur in haar derde jaar, het gesê om te betoog is al wat die visekanselier na hulle sal laat luister.
“Ons kom van minder gegoede gemeenskappe en kan nie R5 000 bekostig nie. Dit is ons demokratiese reg om te betoog.”
Mazwi-Tanga was nie gedurende die optog op die kampus nie.
Niemand is beseer of in hegtenis geneem nie.
–Die Burger
