Studente in ongeluk na hul vir polisie wegjaag
2010-01-14 10:11
Bloemfontein - Vyf Kovsiestudente was Woensdagoggend vroeg in ’n motorongeluk betrokke nadat hulle glo onder die invloed van drank bestuur en vir die polisie probeer wegjaag het.
Die bestuurder van die wit Golf waarin hulle gery het, is in hegtenis geneem.
Een van sy passasiers is in ’n ernstige toestand in die intensiewesorgeenheid van die Bloemfontein-Medi-Clinic opgeneem.
Die ongeluk kom kort ná die aankondiging dat studente van volgende week af nie meer op die kampus sal kan drink nie.
Die groep studente het blykbaar Woensdag omstreeks 03:30 in die stad gery toe patrollerende polisiebeamptes opmerk dat hulle roekeloos bestuur, die spoedperk oorskry en verskeie rooi ligte verontagsaam.
Kapt. Chaka Marope, polisiewoordvoerder, sê die bestuurder het vir die polisie probeer wegjaag toe dié hulle probeer stop.
By die Hoër Meisieskool Oranje, op die hoek van Aliwal- en Harry Smithstraat, het die motor teen ’n verkeerslig gebots.
Een van die insittendes, ’n 19-jarige man van Orkney, is ernstig in die botsing beseer. Hy is deur paramedici van die Life-Rosepark-hospitaal en ER24 behandel en met veelvuldige beserings na die Medi-Clinic gehaas.
Die bestuurder van die motor is op die toneel weens dronkbestuur en roekelose en nalatige bestuur in hegtenis geneem. Volgens ’n anonieme ingeligte wat op die ongelukstoneel was, was al die studente onder die invloed van drank.
Volksblad kon nie Woensdag bevestig of al die studente wat by die ongeluk betrokke was, wel in koshuise woon nie. Na verneem word, is drie van hulle, onder wie die beseerde, egter eerstejaars. Eerstejaarstudente mag volgens universiteitsreëls nie op die kampus drink nie, ongeag hul ouderdom.
Rudi Buys, UV-dekaan van studentesake, sê hy is ontsteld oor die ongeluk en sal seker maak die voorval word ondersoek en die betrokke studente kry die nodige ondersteuning.
“Ek is baie ontsteld oor die ongeluk, veral omdat van ons studente daarby betrokke was, iemand beseer is, en dit juis terwyl ons probeer om drankmisbruik onder ons studente te bekamp en probeer om ongelukke soos hierdie te verhinder deur aan studente leiding te gee oor gesonde drankgebruik.”
- Volksblad