Student vang baba by taxi-staanplek
2010-05-18 09:10
Nurene Jassiem
Kaapstad - ’n Nagraadse verloskunde-student aan die Universiteit Stellenbosch (US) se voorbereiding op haar teorie-eksamen het gisteroggend prakties geword toe sy ’n baba by die Bellville-taxistaanplek gevang het.
Susan Hendricks (44) het omstreeks 08:00 – te midde van die vervoerstaking – in die tou gestaan om ’n taxi na die US se Tygerberg-kampus te haal toe sy Nopinkie Ntshono (41) langs haar hoor kreun.
“Sy het geskreeu: ‘Dit kom!’ Toe besef ek sy is besig om te kraam.
“Ek het gesien haar water het reeds gebreek en die baba se kop was al sigbaar.”
Hendricks het vroeër as ’n algemene verpleegster gewerk en sit nou haar studies voort.
Maar nou moes sy vinnig dink. Binne enkele oomblikke het medependelaars ’n beskermende kring om Ntshono gevorm.
Handdoeke en ’n kombers het as ’n tydelike bed gedien.
“Die baba is sonder moeite gebore. Ek het hom warm gevryf met ’n handdoek wat iemand by die taxistaanplek gegee het.
“Hy het begin skree. Ek het hom dadelik aan sy ma se bors laat drink sodat hy nie siek word nie.”
Daar was niks om die babaseun se naelstring mee te sny nie. Hendricks, Ntshono en die baba moes dus so gou moontlik by ’n hospitaal uitkom.
Die drie het hul beurt vir plek op die volgende taxi na Tygerberg afgewag. Hulle moes wag dat dié taxi eers vol word voordat hulle na die Tygerberg-hospitaal se noodeenheid kon ry.
“Ek was baie bang oor my baba. As dié vrou my nie gehelp het nie, weet ek nie wat van my baba sou geword het nie.
“Ek is gelukkig dat my kind gesond is,” het die ma van vyf gesê. Sy woon by die N2 Gateway-behuisingsprojek in Delft.
Hendricks het gistermiddag verder studeer vir haar verloskunde-eksamen vandag.
Sy het egter belowe om in voeling te bly met die ma van die eerste baba wat sy gevang het.
- Die Burger
- Die Burger