Student se lyk moontlik gevind
2010-10-12 06:26
Volksblad
Kaapstad - ’n Lyk wat Saterdagmiddag by Visbeenbaai aan die Weskus gevind is, is moontlik dié van ’n student wat twee weke gelede by Hondeklipbaai vermis geraak het.
Ao. Gerrit Cloete, woordvoerder vir die Springbok-polisie, het gesê die lyk is vermoedelik dié van Jaco Kotze (26) van Welkom.
Kotze het vir sy doktorsgraad in chemiese ingenieurswese gestudeer en was ook ’n deeltydse dosent aan die Noordwes-universiteit (NWU) in Potchefstroom.
Die lyk, in ’n rooi duikpak, is volgens hom omstreeks 16:20 by Visbeenbaai tussen Hondeklipbaai en Koingnaas gevind.
Cloete het gesê dit is deur lede van die reddingspan, wat sedert Kotze se verdwyning op 29 September onverpoos na hom gesoek het, gevind.
Omdat die lyk al ontbind het, sal ’n nadoodse ondersoek gedoen moet word om vas te stel of dit wel die vermiste student is.
“DNS (toetse) sal nou ingespan word,” het Cloete gesê.
Kotze se ma, Margie, van Welkom, het oor die naweek gesê sy is Saterdagmiddag ingelig ’n lyk – moontlik dié van haar seun – is gevind.
Sy het gesê as dit wel hy is, is sy net bly dat sy haar seun sal kan begrawe en dat die hoofstuk in hul lewe afgesluit kan word.
Kotze het vermis geraak ure nadat hy by ’n gastehuis op Hondeklipbaai ingeteken het.
Die eienaar van die Skulpieskraal Tented Lodge waar hy sou oornag, Rob Meintjes, het gesê dat hy kort ná sy aankoms daar gevra het waar hy kan gaan stap.
Hy is nooit weer gesien nie.
Verlede week is berig daar is bespiegel dat Kotze moontlik deur ’n golf van ’n rots bekend as Spitfire geslaan is.
- Volksblad