Student ontken klag teen Pistorius
2011-07-08 09:10
Pretoria - Die student van wie die naelloper Oscar Pistorius R2,2 miljoen skadevergoeding eis, sê sy het in geen stadium ’n klag teen Pistorius by die polisie ingedien nie.
Cassidy Taylor-Memmory het op haar beurt ’n teeneis teen Pistorius by die hooggeregshof in Pretoria ingedien.
Sy eis dat Pistorius haar in die openbaar om verskoning vra nadat hy haar “as ’n leuenaar, fortuinsoeker, aandagsoeker en as aggressief in die media beskryf” het.
Taylor-Memmory het pas haar verweerskrif in Pistorius se eis aan hom laat beteken.
Pistorius beweer Taylor-Memmory het kwaadwillig ’n aanrandingsklag teen hom ingedien en dat hy toe in hegtenis geneem en aangehou is.
Pistorius is nie op die klag vervolg nie.
Hy sê in hofstukke hy het skade van R2 218 988 gely weens Taylor-Memmory se optrede, onder meer omdat twee instellings geweier het om hul handelsmerk-ambassadeur-ooreenkomste met hom te hernu.
Taylor-Memmory sê in haar verweerskrif sy het op versoek van polisielede “slegs inligting verskaf” oor Pistorius se gedrag by sy huis (in Silver Lakes, Pretoria) op 12 September 2009.
Volgens haar was dié inligting dat Pistorius ’n besering by haar veroorsaak het. Hy het veroorsaak dat ’n stuk hout van sy voordeur op haar been val nadat hy die deur probeer toemaak het.
Die verskaffing van dié inligting, wat nie vals is nie, stel nie die indiening van ’n klag daar nie.
Sy weet nie van ’n “formele klag” nie, sê sy.
Taylor-Memmory ontken sy het die deur geskop sodat ’n stuk hout afgebreek en haar teen die been getref het.
Sy was toe “medies en fisiek ongeskik” en kon nie die deur skop nie.
Pistorius is op polisie-aandrang en -diskresie in hegtenis geneem en aangehou, beweer sy.
Taylor-Memmory ontken dat Pistorius regskoste van R38 988 moes betaal om homself teen die aanrandingsklag te verdedig.
Sy sê die “handelsmerk-ambassadeurkontrak vir Nedbank” het van 1 Januarie tot 31 Desember 2009 gegeld. Dit sou nie noodwendig deur Nedbank verleng word nie.
Ook die “memorandum van ooreenkoms” tussen Pistorius en Sys-pro SA het ses maande in 2008 geduur. Dié ooreenkoms het nie vir die verlenging daarvan voorsiening gemaak nie.
In haar teeneis sê Taylor-Memmory dat Pistorius se stellings oor haar in die media haar verneder en beledig het.
Die skade wat sy daardeur gely het, kan nie vasgestel word nie.
Pistorius skuld haar ’n openbare verskoning, lui haar teeneis.
- Volksblad