Student ‘kan lig werp op raaiselmoord’
2009-08-20 06:29
Kaapstad - ’n Student aan die Kaapse Skiereiland Universiteit van Tegnologie kan moontlik lig werp op die raaiselagtige dood van Elisabeth Dos Santos (47).
Dos Santos, ’n voormalige teksversorger van die tydskrif You, se man het haar verlede Vrydag dood in hul huis in University Estate, Kaapstad, gevind. Sy is verwurg.
Na verneem word, het Dos Santos die student, wat gereeld Vrydae by die huis aangekom het, met redigeerwerk gehelp.
Sers. Hilton Malila, polisiewoordvoerder in Woodstock, het gesê Dos Santos se man, mnr. Jens Kuhn, het Vrydag ná 17:30 tuisgekom en op haar lyk afgekom.
“Die staalhek voor die voordeur was oop.” Malila het gesê Kuhn het dit vreemd gevind, omdat die hek nooit oopgestaan het nie. Die voordeur was egter gesluit.
Hy het sy vrou in die gang naby die voordeur aangetref en ’n ambulansdiens gebel. Sy is op die toneel dood verklaar.
Kuhn het gister gister gesê hy kan nie glo wat met sy vrou gebeur het nie.
Hulle was 20 jaar saam en vier jaar getroud.
Esmaré Weideman, redakteur van Huisgenoot, You en Drum, het gesê almal is geweldig geskok oor Dos Santos se dood.
“Sy het in April 2007 om mediese redes ophou werk omdat haar siekte (veelvuldige sklerose) dit vir haar onmoontlik gemaak het om die strawwe pas by You vol te hou. Maar ons onthou haar as die knap en sprankelende vrou wat sy in vroeëre jare was.”
“Die omstandighede waarin sy dood is, is werklik ontstellend. Hoe kon enigiemand so ’n weerlose vrou skade wou aandoen?”
Sy het voorheen ook by Reader’s Digest, Femina, Fairlady en die Cape Argus gewerk.
’n Buurvrou, mev. Lorna Johnson, het gesê sy en haar man het Dos Santos nog Vrydagmiddag gesien. “Sy het gaan inkopies doen. Ons sit gewoonlik op die stoep en wag tot sy terugkeer.”
Weens Dos Santos se siekte het hulle altyd gewag dat sy van haar uitstappies terugkeer omdat sy soms hulp nodig gehad het om te loop.
Volgens Johnson het sy Vrydag teruggekeer en vir hulle gewaai.
Johnson en haar man het daarna in hul agtertuin gaan sit omdat die son lekker geskyn het.
“Ons het haar nie weer gesien nie en kan ongelukkig nie sê of die student wel opgedaag het nie.”
Malila het gesê die ondersoek is in ’n sensitiewe stadium.
Dos Santos word môre om 11:30 uit die Katolieke kerk St. Augustine in die Paarl begrawe.
- Die Burger