Student geskors ná anti-Semitiese stellings
2011-06-17 07:05
Johannesburg. – Die Mail & Guardian (M&G) het ’n
leerling-joernalis geskors en gaan hom dissiplinêr verhoor weens
beweerde anti-Semitiese stellings op die sosiale netwerk Facebook.
Die student, Ngoako Matsha, is volgens M&G Online Woensdag geskors.
Matsha werk sedert Februarie vanjaar as intern daar.
Matsha het glo in reaksie op ’n inskrywing op Facebook van ene
Benji Shulman, gevra dat Facebook-gebruikers voorstelle moet gee vir ’n
“basiese ordentlike geskiedenis van apartheid”.
Matsha het in reaksie geskryf “kleinlike apartheid bou hoë mure om Israel van Palestyne te skei”.
Shulman het onder meer gereageer met die woorde: “Dankie vir
daardie stuk pseudo-politiek, maar ek het iets nodig wat staande sal bly
teen ’n logiese argument.”
Matsha het hierop glo met dié stelling gereageer: “Julle rassiste!
Geen wonder Hitler het al die Jode doodgemaak nie, want julle is almal
’n spul rassiste.”
Nic Dawes, hoofredakteur van M&G, het Woensdagoggend vir ’n
onderhoud met Jeremy Maggs van e-tv opgedaag, en is deur ’n gebruiker
van Twitter van Matsha se uitlating in kennis gestel.
Dawes het volgens M&G Online dadelik met Matsha se toesighouer
gepraat om vas te stel of die bewering waar is, en is ingelig dat dit
wel die geval is.
Hy is later terug na die kantoor waar hy met Matsha gepraat en hom
ingelig het dat hy geskors is en ook dat hy aan ’n dissiplinêre verhoor
onderwerp sal word.
Dawes het daarna in e-pos aan die personeel gesê Matsha se
opmerkings is grondliggend strydig met die fundamentele waardes van
M&G, die Grondwet en basiese menslike ordentlikheid.
“Om die Joodse volksmoord op só ’n manier te regverdig is
haatspraak en is heeltemal onaanvaarbaar in enigse forum,” lui Dawes se
e-pos.
Dawes het gesê hy was uiters teleurgesteld en ook kwaad toe hy van die opmerkings verneem het.
Dit was ook weersinwekkend om te sien dat sy koerant aan hierdie saak gekoppel word.
Dawes het gesê selfs al het die saak nie in die openbaar bekend
geword nie sou die erns daarvan vereis het dat ernstige opgetrede gedoen
word. Die koerant het onlangs ’n reeks werksessies gehou waar die
beleid vir sosiale netwerkmedia bespreek is. Dit is duidelik gemaak op
hierdie sessies dat werknemers op sosiale netwerke net dit behoort te sê
wat hulle bereid is om gepubliseer te sien.
Matsha kon teen druktyd nie vir kommentaar bereik word nie.
Volg Nuus24 op Twitter