Student betaal 2 glo om ouers te vermoor
2010-08-31 07:35
Pretoria - ’n Student (18) van Standerton het twee medestudente glo R250 000 beloof om sy ouers Sondag te vermoor.
Kort ná die moord is een van die vermeende huurmoordenaars in ’n motorongeluk dood.
Die ander een is in ’n bedenklike toestand in die hospitaal.
Twee aanvallers het Mohamed Makda (44) en Fatima Makda (37) in die vroeë oggendure in hul huis in Sydney de Langestraat 101, Stanwest, met messe doodgesteek.
Die Makda-egpaar se seun Zahid is enkele ure ná die moord in hegtenis geneem.
Volgens kapt. Leonard Hlathi, polisiewoordvoerder, het Makda jr. na bewering twee studente wat saam met hom in die Stanwest-kollege is, gehuur om sy
ouers te vermoor.
Hy het glo aangebied om hulle R250 000 daarvoor te betaal.
Sowat ’n uur ná die moord was die twee vermeende huurmoordenaars in mev. Makda se Peugeot in ’n motorongeluk op die R23-pad na Johannesburg.
Die motor het gerol.
- Beeld