Stropers ál aggressiewer
2011-11-14 09:12
Pretoria – Minstens 16 renosters kan binne die volgende 7 weke in Suid-Afrika gestroop word.
Dit sal die totaal bring tot ’n nuwe rekord van 364 renosterstropings vir 2011.
Genl.maj. Simon Mapyane, hoof van die Valke in Mpumalanga, het die afgelope naweek dié tragiese voorspelling gemaak op ’n nasionale beraad vir die private renoster-eienaarsvereniging by Onderstepoort buite Pretoria.
Hy het gesê die stropers raak toenemend aggressief en begin hulle toespits op private eienaars.
Hulle is veral aktief rondom volmaan (volgende op 10 Desember) wanneer hulle snags goed kan sien, het Mapyane gesê.
Die Valke se statistieke toon sedert Januarie is 166 stropers aangekeer, asook 22 ontvangers of koeriers, nog 9 verder af in die smokkelnetwerk en 2 uitvoerders, maar geen kopers wat die produk aan die eindpunt ontvang nie. Die stropers beweeg in groepe en is gewapen met AK47- en swaarkaliberjaggewere. Een het selfs handgranate in sy besit gehad.
Adv. Antoinette Ferreira, ’n senior advokaat van die direkteur vir openbare vervolging in die Vrystaat, het gesê bestaande wetgewing stuit nie die stropers nie.
Die wildboere pleit nou dat handel in renosterhorings gewettig word, omdat hulle glo dit is die enigste manier om die diere van uitwissing te red.
“Dit is soos prostitusie, jy sal dit nooit stop nie. Daar is ’n mark vir die horings,” het Jacques Malan, ’n bekende wildboer, gesê.
Ferreira het gesê die aanvraag is onversadigbaar al is daar geen bewyse dat die keratien waaruit die horings bestaan, medisinale waarde het nie.
Ondersteuners van wettiging glo renosters moet privaat besit word en hul horings gereeld gesaag word, omdat dit teruggroei. Die wins wat uit horingverkope gemaak word, kan vir die bewaring van spesie gebruik word.
Sommiges glo ’n verbod op ’n produk stoot die prys daarvan op en dryf handel in die hande van georganiseerde misdaad.
Die probleem is, al word die verkope van renosterhorings eendag in Suid-Afrika gewettig, sal die boere steeds ingevolge internasionale wetgewing verbied wees om dit oorsee te verkoop, het Ferreira gesê.
Die mark vir die horings is glo 3 miljard mense in die Ooste wat onder meer glo dit genees kanker. Ferreira meen dit is onrealisties om te dink soveel mense kan oortuig word dit het geen medisinale waarde nie.
“Dit is 3 miljard mense teen 22 000 renosters soos sake nou staan.”
Diegene wat glo in ’n verbod op renosterjag, is om etiese redes gekant teen die wettiging van horingverkope, ook omdat dit handel in onbewese medisyne ten koste van die diere bevorder.
Volg Nuus24 op Twitter
- Volksblad