Strate in Sasolburg steeds ontoeganklik

2013-01-23 09:19

Johannesburg – Die polisie monitor Woensdagoggend die Zamdela-woonbuurt in Sasolburg in die Vrystaat nadat minstens twee mense in betogings gesterf het.

Kol. Motantsi Makhele het gesê daar is 'n sterk polisieteenwoordigheid in die gebied, maar die situasie is onder beheer en geen geweld is oornag aangemeld nie.

"Die enigste ding is dat sommige strate steeds ontoeganklik is."

'n Betoger is Dinsdag by die Zamdela-polisiekantoor doodgeskiet in 'n geveg met die polisie.

Vroeër die dag het die polisie gesê 'n motoris het 'n betoger doodgeskiet nadat 'n groep 'n straat versper het.

'n Joernalis van Jacaranda FM se motor is met klippe bestook en 'n Sapa-kameraman is met 'n mes gedreig.

Makhele het gesê hy kan nie 'n berig in The New Age bevestig dat drie mense gesterf het nie. Hy weet nie hoeveel mense beseer is nie.

Die geweld, wat Sondag begin het, is veroorsaak deur planne om die Sasolburg- en Parys-munisipaliteit saam te smelt. Richard Baloyi, minister van samewerkende regering, het Dinsdag aangekondig dat dié planne laat vaar is.

Meer as 200 mense is sedert die begin van die geweld in hegtenis geneem.

– Volg Nuus24 op Twitter

- SAPA