'Stormloop by UJ moet ondersoek word'
2012-01-11 09:01
Johannesburg – Die regering sê die dood van ‘n vrou wat in ‘n stormloop by die Universiteit van Johannesburg (UJ) gesterf het, moet volledig ondersoek word.
"Hierdie is ‘n betreurenswaardige voorval," het Jimmy Manyi, ‘n woordvoerder vir die regering, Dinsdagaand in ‘n verklaring gesê.
Manyi meen die verbetering in die matriekslaagsyfer moet ‘n rede vir feesviering en nie tragedie wees nie.
"Hierdie is ‘n betreurenswaardige voorval wat hopelik volledig ondersoek sal word."
UJ het Dinsdag gesê die universiteit sal die stormloop ondersoek. Altesaam 22 mense is beseer, waarvan twee kritieke beserings opgedoen het.
Manyi het sy meegevoel met die geaffekteerde families gedeel.
The Times het Woensdagoggend die oorledene as Gloria Sekwena (47) geïdentifiseer. Sy was die ma van ‘n voornemende student, Kgositsile Sekwena.
Sy het gesterf toe 'n skare by die kampus ingestorm het om hul aansoeke te verseker.
Beeld het Woensdagoggend berig dat die DA Blade Nzimande, minister van hoë onderwys, daarvan beskuldig dat hy verlede jaar na die ellelange toue by universiteite as ’n “wonderlike probleem” verwys het.
Nzimande het Dinsdag maatreëls aangekondig om soortgelyke voorvalle in die toekoms te verhoed.
Sy departement oorweeg dit om nie meer “instap-aansoeke” aan die begin van die jaar toe te laat nie.
Volg Nuus24 op Twitter
- SAPA