Stiefpa val glo dogter, vrou aan
2011-09-24 07:05
Welkom – ’n Welkomse ma en haar 15-jarige dogter het ternouernood aan die dood ontkom toe hulle in hul huis na bewering deur die vrou se man, wat die kind se stiefpa is, met ’n skroewedraaier aangeval is.
Rita McDougall het vyf steekwonde opgedoen waarvan een haar hart rakelings gemis het. Haar neus is ook gebreek.
Haar dogter, wie se naam op versoek nie bekend gemaak word nie, is met die skroewedraaier in die rug gesteek en dit het die punt van haar een long raakgesteek.
Albei moes verskeie hegsteke kry.
McDougall se man, Griffith McDougal (44), het homself Woensdagmiddag aan die polisie oorgegee minute voordat hy met die hulp van Leon Rossouw, Bloemfonteise selfoonspeurder, vasgetrek sou word.
Hy het Vrydag vlugtig hier in die hof verskyn en die verhoor is vir sewe dae uitgestel. Klagte van poging tot moord en oortredings van die Wet op Gesinsgeweld word ondersoek.
Mev. McDougall het reeds vroeër ’n interdik teen haar man verkry om hom te keer om haar aan te rand. Die egpaar is besig om te skei, maar het steeds ’n huis gedeel.
Hulle was vyf jaar getroud en die dogter is uit ’n vorige verhouding.
Sy sê sy en haar dogter het in dieselfde kamer gelê en slaap toe ’n man omstreeks 02:00 ingekom en haar met die skroewedraaier aangeval het sonder om ’n woord te sê.
“Ek het vir my lewe terugbaklei.”
Die kind het die man van agter vasgegryp, maar hy het omgedraai, haar in die rug gesteek en teen die bedkassie vasgeskop.
Mev. McDougall en haar dogter kon daarin slaag om van die aanvaller deur ’n klein, smal oopmaakvenster in die voordeur te ontvlug en het om hulp geroep, waarna hy weggehardloop het.
Die kind se pa, Henry Jones van Bloemfontein, het Rossouw gekontak om na die verdagte te help soek. Hy is in Welkom opgespoor, maar het homself kort daarna aan die polisie oorgegee.
Volg Nuus24 op Twitter.
- Volksblad