Stellenbosch skarrel ná aanval op prof
2011-07-15 07:01
Stellenbosch - “Stellenbosch beskik nie oor genoeg beskerming om Anton van Niekerk te beveilig nie.”
Dié dreigement is glo Donderdag deur ’n lid van die Volksraad-verkiesingskommissie (VVK) aan personeel van die Universiteit van Stellenbosch (US) oorgedra nadat Abel Malan (48) na bewering vir prof. Anton van Niekerk (57) in sy kantoor in die Lettere-gebou aangerand het.
Die VVK is ’n organisasie wat Afrikaners oproep om hulself op ’n alternatiewe kieserslys te laat registreer, wat dan gebruik sal word om ’n alternatiewe Afrikaner-volksraad te verkies. Die einddoel is om deur onderhandelinge met die ANC ’n eie grondgebied te bekom en ’n nuwe Afrikanerland te vestig.
Malan (48), ’n sakeman van Nelspruit en ’n kandidaat van die VVK, het ’n afspraak met Van Niekerk, direkteur van die sentrum vir toegepaste etiek aan die US, gereël. Dit was na aanleiding van ’n artikel deur Van Niekerk getiteld Moet apartheid nie vergoeilik nie, wat op 5 Julie in Die Burger verskyn het.
In dié artikel was Van Niekerk krities oor Afrikaanse intellektuele wat Suid-Afrika se betrokkenheid in die Grensoorlog regverdig. Hy het onder meer geskryf: “As wit mense sit ons met enorme skuld ten opsigte van die verlede.”
Volgens ao. November Filander, ’n polisiewoordvoerder, het ’n stryery ontstaan, waarin “die verdagte aggressief geraak en die kantoorlessenaar op die professor omgekeer het”.
“Hy het die slagoffer ook fisiek aangerand. Die US se beskermingsdienste (USBD) het die verdagte in hegtenis geneem en aan die polisie oorhandig.”
Prof. Russel Botman, US-rektor, het Donderdag beweer Malan het ook “verskeie dreigemente geuiter”.
Botman het Donderdagmiddag op ’n nuuskonferensie gesê Van Niekerk het ernstige kneusings aan sy gesig opgedoen en sy bril is gebreek. Hy het ná die voorval ’n dokter en ’n trauma-beampte gespreek. Van Niekerk het beleef navrae na die US se kommunikasie-departement verwys. Volgens Botman was ’n sekerheidsbeampte in die kantoor oorkant dié van Van Niekerk gestasioneer en het die USBD vinnig opgetree om die aanval te stop.
Botman het die aanranding bestempel as “’n laakbare daad en verwerplik in die konteks van ons pogings en strewe om ’n Suid-Afrika te skep waarin die regte van al sy mense beskerm word”.
Volgens Botman het van Malan se meelopers buite die Lettere-gebou op hom gewag. Ná Malan se inhegtenisneming het van hulle buite die Stellenbosch-polisiekantoor gestaan.
Ben Geldenhuys van Pretoria en ’n kandidaat van die VVK, het vertel hulle is besig met ’n landwye toer om hul kandidate bekend te stel. Hulle het Woensdagaand op Stellenbosch voor sowat 100 mense vergader.
Die Verkennersbeweging van Suid-Afrika, waarvan Malan vise-president is, het hom vir sy beweerde aanval geprys.
“Die beweging het begrip vir die optrede van mnr. Malan en is trots op die onverskrokkenheid wat deur sy leiers geopenbaar word.”
’n Klag van aanranding met die opset om ernstig te beseer word ondersoek. Malan sal na verwagting vandag in die Stellenbosch-landdroshof verskyn.
- Die Burger