Steenkamp-moorde: Skool sê seun mag nie terugkom
2012-09-04 09:47
Johannesburg – Die tiener wat van die moorde op die Steenkamp-gesin aangekla word, is uit op borgtog, maar sal nie terugkeer na sy skool nie, het ‘n koerant berig.
Die Griekwastad-kinderhof het die minderjarige moordbeskuldigde borgtog van R5 000 toegestaan.
Die seun se Bloemfonteinse skool het aan Beeld gesê die tiener sal nie op die skoolgronde toegelaat word nie, hangende die uitkoms van die verhoor.
Hy is vroeër in hegtenis geneem in verband met die moorde op Deon Steenkamp, sy vrou, Christelle, en hul dogter, Marthella. Hulle is op Goeie Vrydag op hul plaas, Naauwhoek, doodgeskiet.
Die voorsitter van die skool se beheerliggaam sê hulle het opsies noukeurig oorweeg en met ‘n sielkundige vergader.
“Die beheerliggaam het besluit dat dit onvanpas is om hom toestemming te gee om na die skool of sy koshuis terug te keer...”
Hy sê die seun is steeds een van die skool se leerlinge en dat sy akademiese vordering belangrik is. Die seun sal moontlik by die huis met skoolwerk bygestaan word.
Die koerant berig die tiener moet op 1 Oktober weer in die hof verskyn vir die bepaling van ’n verhoordatum in die hooggeregshof.
Volg Nuus24 op Twitter
- SAPA
