Stappers sterf in Swartberge
2009-09-28 18:30
Johannesburg - Die liggame van al drie stappers wat in die Swartberge naby Oudtshoorn vermis geraak het, is gevind.
Volgens insp. November Filander, polisiewoordvoerder, is die liggame van drie vroue tussen die ouderdomme van 46 en 51 gevind nadat ‘n noodboodskap deur ’n groep stappers uitgestuur is.
Die vroue was deel van ‘n groep van vier vroue en twee mans uit Kuilsrivier en Belville, naby Kaapstad.
Die groep het glo Sondag met ‘n staptog in die Swartberge begin. Hulle is egter opgebreek toe sneeu skielik begin neersak het.
Een van die mans het Sondag via sms ‘n noodboodskap aan sy vrou gestuur. Sy het die polisie gekontak en ‘n reddingspan is ontplooi.
Reddingswerkers het Sondag reeds die liggame van twee van die vroue opgespoor en die res van die stappers gered. Die derde vrou se lyk is Maandag eers gevind.
Die saak word ondersoek.
– Sapa