Stander-ongeluk: Taxibestuurder aangekla
2013-01-04 17:59
Fotogalery - Burry Stander sterf in padongeluk
klik op klein foto bo om groter prentjie te sien
Durban – Die bestuurder van die minibustaxi wat betrokke was by die botsing waarin die fietsrylegende Burry Stander dood is, sal Maandag in die Port Shepstone-landdroshof verskyn, het die polisie gesê.
Die bestuurder sal, ná die polisie met die direktoraat van openbare vervolging (DOV) oorleg gepleeg het, teregstaan op 'n aanklag van strafbare manslag, het kol. Jay Naicker Vrydag gesê.
Stander, 25, het Donderdagmiddag van 'n oefenrit in Shelley Beach aan die KwaZulu-Natalse suidkus teruggekeer toe die noodlottige ongeluk plaasgevind het.
Beeld het berig dat dit buite die fietsrywinkel Concept Cyclery plaasgevind het. Stander se pa, Charles, die bestuurder van die winkel, het die ongeluk gehoor plaasvind.
Durban se Daily News het berig dat plaaslike fietsryers Saterdag 'n massa-fietsrybyeenkoms ter ere van Stander sal hou. Kevin Govender, 'n ooggetuie, het volgens die koerant gesê Stander se familie was binne minute op die ongelukstoneel.
Govender het gesê die taxibestuurder was geskok en “het gelyk of hy nie weet wat om te doen nie”.
“Hy het gesê... hy het nie die fietsryer gesien nie en weet nie hoe die ongeluk gebeur het nie,” het Govender gesê. Hy het toegekyk terwyl Stander se vrou, Cherise, hom vasgehou het.
“Dis een van die hartseerste goed wat ek al ooit gesien het. Sy ma was heeltemal verbysterd. Ek kon nie slaap nie want die gebeure het die heeltyd voor my afgespeel. Dit was baie hartseer,” het hy gesê.
– Volg Nuus24 op Twitter.
- SAPA
