Stakings lei tot geweld
2009-07-27 16:20
Kaapstad – Ekstra wetstoepassers moes ingeroep word om oproerige stakers in Khayelitsha, Killarney en Nyanga onder beheer te bring.
Verder is groot gemors gesaai nadat duisende munisipale werkers Maandag regoor die land oor loonverhogings gestaak het.
Kylie Hatton, woordvoerder van die Kaapstadse departement van wetstoepassing, het gesê een van die stad se wetstoepassers is aangerand.
Versterkings moes toe ingeroep word om orde te handhaaf.
In verskeie dele van die land het stakers straatverkopers geteister, asblikke in die straat uitgegooi en Suid-Afrikaners met minimale dienslewering gelaat.
Vakbonde wat die 150 000 lede verteenwoordig, het ‘n lang lys van vereistes en sê dat werknemers sukkel om kop bo water te hou met inflasie wat verlede jaar 13.7% bereik het.
Drie mense is in Limpopo beseer nadat die polisie rubber koeëls na onordelike stakers geskiet het, het Limpopo polisie gesê.
Amptenare van vakbonde moes in Pretoria intree om te voorkom dat stakers straatverkopers langs die pad beroof.
Hulle het ook asblikke in die strate leeggemaak, wat daartoe gelei het dat die polisie ‘n waterkanon moes gebruik om hulle op te breek.
Die ANC is gekant teen die aksies van sommige van dié werkers.
“Ons glo vas dat die munisipale staking, wat tot gevolg het dat strate geplunder word, slegs opgelos kan word deur onderhandelinge,” het die ANC in ‘n verklaring gesê.
Die DA het gesê dat verskeie klinieke in en om Johannesburg gesluit was.
“Dit moet te doen hê met intimidasie aangesien meeste verpleegsters nie lede van Samwu is nie,” het Jack Bloom, woordvoerder van die DA gesê.
Mvume Dlandla, parlementêre Cope-leier, het die stakings op die regering se "onvermoë om met die mense te kommunikeer" geblameer.
Terselfdertyd het die Suid-Afrikaanse Vereniging van Plaaslike Owerhede (Salga) vakbonde genader om terug te keer na die onderhandelingstafel.
Hulle sê dat hulle die loonaanbod reeds van 10.5% na 13% verhoog het.
- Sapa