Stakings jaag brandstofprys op

2012-10-09 16:41

Kaapstad – Suid-Afrikaanse ekonome meen die wydverspreide stakings kan moontlik tot duurder brandstof in November lei, het Landbou.com berig.

Hoewel ekonome aan die begin van die maand verwag het dat die brandstofprys aanstaande maand moontlik kan daal, meen hulle nou die uitwerking wat die stakings op die ekonomie en rand het, kan tot ’n styging in die brandstofprys lei.

Dawie Roodt, senior ekonoom van die Efficient-groep, sê die hoogste vlak wat die rand Maandag bereik het, was R8,99 teenoor die Amerikaanse dollar.

Volgens talle mediaberigte het die rand-dollarwisselkoers Maandag sy swakste vertoning sedert April 2009 aangeteken.

Roodt het vroeër vandeesmaand aan Landbou.com gesê die brandstofprys kan in November met tussen 20c en 30c daal. Hy sê indien die wisselkoers vir die res van Oktober bly op die vlakke waar dit tans beweeg, kan ’n styging van tussen 5c en 10c per liter brandstof moontlik wees.

Volg Nuus24 op Twitter 

- Landbouweekblad