Stakings: OTM'e kan droogloop, waarsku bank

2012-09-29 07:44

Johannesburg - Capitec-bank het sy kliënte gewaarsku dat die landwye staking in die vervoerbedryf kan veroorsaak dat kitsbanke uit kontant uit hardloop.

Volgens die bank kniehalter die staking die aflewering van kontant aan kitsbanke, het RSG Saterdag berig.

Die radiostasie 567 Cape Talk het ook in die week reeds berig dat kliënte van Standard Bank nie die volle bedrae geld wat hulle by kitsbanke gevra het, kon trek nie.

Die aflewering van brandstof en ander noodsaaklike goedere word ook deur die staking geraak.

Die Padvragbestuursvereniging (RFEA) het die hof Vrydag genader vir 'n interdik wat geweld deur stakende werkers verbied na ’n toename in geweld en intimidasie sedert die staking begin het.

Die vereniging wil hê die hof moet die staking as onwettig verklaar.

Die saak duur Maandag voort.

Volg Nuus24 op Twitter.