Staking sleep voort in Wes-Kaap

2013-01-14 08:19

Johannesburg – Cosatu het die naweek aangekondig dat stakende plaaswerkers vandeesweek hul betogings in die Wes-Kaap sal voorsit.

Die kommissie vir versoening, bemiddeling en arbitrasie het vroeër sy dienste aangebied in 'n poging om die arbeidsonrus onder plaaswerkers in die provinsie op te los, het die SABC berig.

Die nuusagentskap Sapa berig dit volg terwyl vakbonde die loonaanbod van R105 per dag van sommige boere oorweeg. Duisende werkers eis egter 'n daaglikse minimumloon van R150.

Boere sê die staking dreig om Suid-Afrika se beeld as grootskaalse uitvoerder van gehalte vrugte te skaad.

Werkers hou egter vol dat hulle nie op die vasgestelde loon van R69 per dag kan oorleef nie.

Intussen het die nuusagentskap berig die polisie het vroegoggend reeds rubberkoeëls gebruik om oproerige stakers op De Doorns uiteen te jaag.

Volg Nuus24 op Twitter